Moscow, Jymmang:
Ki bor pyniaid ka Russia ha ka miet Sngi Ba-ar bad step Sngi Balang, ki iathuh ba ki Kad Liengsuiñ jong ka Russia ki la thut lut ka rukom treikam hadien ka jingleit thombor jong ka Ukraine da ki drone bad kaba la pynlong ia ki Kad Liengsuiñ ka Russia ban sangeh noh ia ka jingleit jingwan baroh na katei ka ri.
Ka tnat ïada jong ka Russia ka la iathuh ba ki don palat 112 tylli ki drone jong ka Ukraine kiba la ioh siat pynjulor da ki bor pahara bad ka tnat ïada ri jong ka Russia ha ki kylleng ki bynta khappud jong ka Russia ha katei ka miet baroh shi miet haduh ban da step.
U heh ka Russia, u Sergei Sabyanin, u la iathuh ba ha katei ka miet, ki don haduh 12 tylli ki drone kiba thmu ban leit rung shaduh sha ka phang pdeng jong ka Russia bad kiba la lah ban tehlakam bad siat pynjulor noh da ki bor pahara jong ka Russia.
Kumba 59 tylli kiwei pat ki drone, ki dei kiba ka Ukraine ka thmu ban leit thombor sha ka thaiñ Bryansk jong ka phang Shathie-mihngi ka Russia. Katba kiwei pat kiba tam, ki dei kiba la thmu ban leit thombor sha ka nongbah Kursk, Belgorod, Tula, Oryol bad sha Kaluga.
Kane ka jingleit thombor jong ka Ukraine ha katei ka miet, ka long ruh hadien ba ka Ukraine ka la pynbna ia ka jingleit thombor ba ratbah jong ka Russia haduh 3 sngi lynter sha Ukraine lyngba jong ki drone bad ka Ukraine ka ong ruh ba kane ka jingleit thombor jong ka Russia da ki drone ha kane ka sien, ka long kaba jur tam ban ianujor bad ka jingthombor ka Russia baroh shi katta naduh ba sdang jong ka thma Russia bad Ukraine ha u snem 2022.
Ka Ukraine ka la iathuh ruh ba ka Russia ka la phah leit thombor haduh 900 tylli ki drone hapoh jong kitei ki 3 sngi ka jingleit thombor jongka sha Ukraine, ha kaba 13 ngut ki riew paidbah ki la duh ei ia ka jingim ha ka Sngi U Blei, kynthup ia 3 ngut ki khyllung- khynnah.
