Shillong, Jymmang 28
U Myntri ka Sorkar Jylla, Bah Alexander Laloo Hek ha ka Sngi Balang u la hiar hi dalade sha Sohra na ka bynta ban khmih bad bishar ïa ki kam ba ïadei bad ka jingwad ïa ki shikurim na Indore, Madhya Pradesh, kiba la jah rngai ha ka jingleit shangkai sha ka thaiñ Sohra.
Haba kren sha ki lad pathai khubor, u Bah Hek u la ong ba ka jingleit hiar jong u sha Sohra ka dei hadien ba ki nongïalam ka BJP na Madhya Pradesh ryngkat u Myntri Sorkar ki la pan jingïarap na u ban ïarap lem halor kane ka kam ban wad ïa kitei ki shikurim.
Ha kane ka jinghiar sha Sohra, u Bah Hek u la ïoh ruh ban peit bniah ïa ka jingtreikam jong ki tnat bapher bapher bad u la pynpaw ruh ba donkam ban pynsted ïa ka jingïatreilang bad pynlong ïa ka jingïawad bad u la kular ruh ba ka Sorkar kan kyrshan pura bad kyntu ïa baroh ban ïasnohkti ban dang pynjur shuh shuh ïa ka jingwad ban lap ïa kine ki shikurim kiba la jah noh.
U la pyntip ruh ba haduh mynta ym pat lap ksai satia ïa kitei ki shikurim bad ka jingwad ka dang ïai bteng.
Kine ki shikurim k ila wan poi ha ka shnong Mawlakhiat (Elaka Mynteng) ha ka 22 tarik mynta u bnai Jymmang ban leit jngoh ïa ka jingkieng jri ïa kaba la tip kum ka Double Decker Root Bridge kaba don ha Nongriat ha ryngkat u nongïalam lynti u Bah Wansai.
Kine ki la sah miet ha Shipara Homestay bad dang step ki la mih noh ha ka 23 tarik u Jymmang da ka jingthmu ban leit phai biang sha Mawlakhiat. Hynrei ym shym la ïohi shuh ïa ki naduh kata ka por. Ha ka 24 tarik, la lap ïa ka arshaka (scooty) ba ki shim wai na Sohra Rim, kaba la don lang bad u shabi. Ki pulit ki la ïohpdiang ïa ka jingujor na ki bahaïing jong kine ki shikurim kiba la pyntip ba ka phone jong kine ka la lip naduh ka miet Sngi U Blei.
Ha ka jingtohkit, ki pulit ki la lap ba kitei ki shikurim ki la ieh ïa la ki tiar bad pla ha Manha Homestay kaba don ha Saitsohpen, Sohra, bad hadien la plied noh ïa kine ki pla hakhmat ki bahaïing hynrei ym shym la lapksai satia shano ba ki don. Ki la don lai tylli ki kynhun ba ïa wad (search and rescue team) ïa kine ki shikurim da ka jingïarap lang ki K9 units, ki drone na ka North Eastern Space Applications Centre (NESAC), bad ruh ki pulit Special Operations Team (SOT), kiba la leit ban wad ha kylleng ki jaka.
Kine ki jaka ki kynthup ïa ka Nongriat, Pyndemdkhar, Mawlakhiat, Mawsahew, Wahkaliar bad ha Weisawdong. Ka jingwad ka ïai bteng wat shaduh ki riat ba jylliew jong ka Mawkdok, Umdiengpoh bad Sohra Rim bad ha ryngkat ka shilynter jong ka surok na Shillong sha Sohra.
