Nongstoiñ, Jymmang 28
Kan long lehse ka jing-kyrkhu ïa ki samla ïalehkai jong ka thaiñ Mawshynrut hi baroh kawei hadien bun snem ba ki la mad ïa ki jingeh ban ïalehkai namar ka jingbym biang ka madan ïalehkai. Hynrei, kumba long mynta kane ka thaiñ ka la don ha ka jingkyrmen ba kan sa ïoh ban ïalehkai noh ha ka madan kaba paka kumba long lem kiwei.
Lah ban kdew hangne ba katei ka madan ka la urlong hadien ba u Myntri Rangbah ka Sorkar Jylla u Conrad K. Sangma ha u snem ba la lah (2024) u la pynbna ba ka madan Riangdo kan ïoh noh ïa ka madan ïalehkai ka ban siang da u phlang plastik ne artificial turf.
Ha ka jingbuddien, ïa katei ka madan la mang haduh T. 8 klur tyngka bad mynta ka la sdang ban ïaid shakhmat ïa ka jingpyntrei.
Nalor kane ka madan, ka Mawshynrut mynta ka la ïoh ruh ïa ka Multipur-pose Indoor Hall (2 Court) kaba la mang tyngka kumba T. 2.78 klur tam.
Ïa kane ka madan Artificial Turf la shna ha madan Riangdo bad yn pynïaid da ka Mawshyn-rut Sport Association bad ka jingpyntrei ïa katei ka kam ka la ïaid shaid-shaid, katba ïa ka Indoor Hall la shna ha ka shnong Mawthengkut, bad ka jingpyntrei ïa katei ka Stadium ruh ka la ïaid shakhmat.
Kane ka madan Artifi-cial Turf ka dei kaba nyngkong eh ha West Khasi Hills District bad la khmih lynti ba kane ka madan kan nangïarap ban kyntiew bad pynrhem ïa ka mynsiem ïeit phutbol jong ki samla bad ki paidbah jong ka thaiñ.
Haba ïakren bad ki nongïalam ka Riangdo Youth Sport Social and Cultural Association ba kynthup ïa u Bah Hamar-bamut Synshiang, u Vice Chairman ka shnong Riangdo Bah B. Paliar bad kiwei kiwei kiba la pynpaw ka jingsngewkmen halor ka jingïoh ïa ka madan Artificial Turf ha Riangdo kaba dei ka jingangnud ba la slem jong ki ‘riew rangbah bad ki samla jong katei ka thaiñ.
Ïa ka jaka ban tei ïa katei ka projek la shna ha madan Riangdo bad ïa ka jaka ruh la ïarap ban pynsiew lem da u Bah Methodios Dkhar naduh ka por mynshwa mynba um pat long kum nongmihkhmat.
Ha kaba ïadei bad ka Indoor Stadium ha Maw-thengkut, na ka liang ki samla katei ka thaiñ ba kynthup ïa u Bah Marshan Hoffman Ïawphniaw, Pre-sident Seng Samla Maw-shynrut, Bah Shahkhana Ïawphniaw, dkhot Seng Samla Shnong Maw-thengkut ki la pynpaw ba ka jingïoh ïa kane ka Stadium kan long ka jingkyrkhu bad kan long ruh ka kabu ïa ki samla ba kin lah ban sei bad pyndonkam hok ïa ka sap.
Kitei ki samla bad ki nongïalam ki la kitbok ruh ïa u MLA ka thaiñ u Bah Methodios Dkhar uba la trei shitom ban wanrah ïa ki kam pynroi ba radbah ha ka dong ka thaiñ hi baroh kawei bad ki la pynpaw ruh ïa ka jingkyrmen ba u MLA un nang wanrah shuh shuh sa ïa kiwei pat ki kam pynroi ïa kaba ka dong ka thaiñ ka dang donkam shibun eh ban roi.
