Guwahati, Jymmang:
Ka Agriculture Insurance Company of India Ltd. (AICIL) bad ka Meghalaya Rural Bank (MRB) ki la ïasoi ïa ka Memorandum of Understanding (MoU) ban ïatreilang ha ka ban ai jingshakri ïa ki jingthung jingtep bad ki jingri jingdup ha kane ka jylla Meghalaya. Ïa kane ka MoU la soi da u Shuvajit Chakraborty uba dei u Regional Manager jong ka ophis jong ka AICIL ha Guwahati ha ka jingïadon lang u Sri Thomas lopes Deputy General Manager ka AICIL bad u General Manager ka MRB.
Kane ka jingïatreilang ka thmu ban kyntiew ïa ka jingpyntreikam ïa ka Pradhan Mantri Fasal Bima Yojana (PMFBY) bad ki skhim Insurance jingri ha ka jylla, da kaba ai ïa ki lad ki lynti kiba bniah ban pynduna ïa ka jingma sha ki nongrep.
Ka MoU ka pynpaw ïa ka jingkular lang ban pynkhlaiñ ïa ka tnad rep ha Meghalaya da kaba ai ïa ki nongrep ïa ki lad jingïada kiba lah ban shaniah ban ïada na ki jingduhnong bym lah khmih lynti.
