Nongstoiñ, Jymmang 28
Ban pynkhlaiñ ïa ka jingai jingsumar ïa ki paidbah nongshong shnong hapoh ka Jylla Meghalaya, ka National Health Mission (NHM) ka la mynjur ïa ka bai kontrak kaba kot sha ka T.6.90,28,000 klur ban pynlong thymmai, ban shna bad pynbiang da ki tiar sumar ha ki Community Health Centre (CHC) ba kongsan jong ka jylla da kaba kyntiew kyrdan sha ka First Referral Units (FRU) ha kaba kane ka la kynthup ruh ïa ka Riangdo CHC kaba la shah jied nalor ka Namdong CHC ha West Jaiñtia Hills District bad Patharkhmah CHC ha Ri Bhoi District.
U MLA ka Mawshynrut Konstitwensi, Bah Methodius Dkhar haba pynpaw lyngba ka rynsan ‘social media’ u la ong, “Ngi pynpaw ka jingsngewkmen ba kane ka dei kawei pat ka jingjop kaba khraw ban pynurlong ïa ki jingangnud jong ki paidbah ka Mawshynrut.”
Shuh shuh u la ong ruh ba ka jingkyntiew ïa ka Riangdo CHC sha ka First Referral Unit kan long ka jingmyntoi kaba khraw na ka bynta kane ka thaiñ.
U la bynrap ruh ba ka Riangdo CHC ka kynthup lang ha ki lai tylli ki CHC ha ka jylla kiba la ïoh ka jingmynjur na ka Sorkar.
U Bah Methodius u la pynpaw ruh ba kane ka bynta ka long ka sienjam jong ka Sorkar ban pynkhlaiñ bad pynïaid beit ïa ki lad jingsumar kiba kloi bad kaba lah ban pynkynriah sha kiwei pat ki hospital, khamtam eh ha ki thaiñ nongkyndong jong ka jylla Meghalaya.
