Shillong, Jymmang 28
Ka Trained Nurses Association of India (TNAI) Meghalaya State Branch ha ka 28 tarik Jymmang, 2025, ka la pynlong ïa ka XV State Student Nurses Associa-tion of India Biennial State Conference halor ka phang pdeng “Learning Today, Leading Tomorrow: The Journey of A Nursing Student” lane “Ka Jinghikai Mynta, Ka Jingïalam Lashai: Ka Jingïaid lynti jong ki Samla Pule Nos” ïa kaba la pynlong hapoh ka Lariti International Centre for Performing Arts and Culture kaba don ha Mawkasiang.
Ïa kane ka XV State Student Nurses Associa-tion of India Biennial State Conference la plie pyrda da u MP ka Lok Sabha, Dr. Ricky AJ Syngkon ha ka jingïa-donlang u Director ka NEIGRIHMS Hospital, Shillong u Prof. Dr. Nalin Mehta, ki nongkitkam ka Trained Nurses Association of India, ki samla pule nos bad kiwei-kiwei.
Haba ai jingkren ha kane ka sngi, na ka liang u Dr. Ricky AJ Syngkon, u la ong ba kum kine ki jingïakynduh ki long kiba donkam bha khnang ba kan don ka jingpynkupbor ïa ki nos ha ka jingtrei jong ki lyngba ka jingïasam jingtip bad ka jingïatreilang para ma ki.
U Dr. Ricky u la pynkynmaw ruh ba ha ka por ba wan lynshop ka khlam Covid-19 dei ki nos kiba trei shitom bad ïakynduh shibun ki jingeh kiba har rukom bad ong ba ka jinglong shlur jong ki ban ai jingsumar ïa ki nongpang ha ka khlam Covid-19, ka ai mynsiem ïa ki paidbah bad ïa ka imlang-ka sahlang baroh kawei.
“Nga kynmaw ba ha ka por ba wan lynshop ka khlam Covid-19, ki nos baroh ki ïakynduh jingeh bha haduh ba ym don kyntien shuh ban batai da kumwei pat hynrei da ka jingaiti lut met bad mynsiem bad da ka jingtrei shitom khlem jingtieng-jingsmiej ki la trei khlem thait. Phi la long ki kti ai jingïarap hapdeng ki jingeh bad ki jingjynjar kiba bun bad phi la ïai don ryngkat hapdeng kita kiei-kiei baroh”, ong u Dr. Ricky.
Shuh-shuh, u Dr. Ricky u la ong ba ki nos kin ïai long u budlum jong ka Ri ha ka liang ka jingai jingsumar bad kin ïai bteng ban long ruh ki nongïaleh kiba shisha ha ka liang ka jingai mynsiem bad kumjuh ha ka kam ai jingshakri.
“Ka kam sumar ka long kaba kham palat ban ïa kiwei ki kam, ka dei ka thong kaba ktah ïa ki jingim briew ka bym lah ñiew shuh bad kaba kyntiew ïa ka imlang-sahlang baroh kawei,” ong u Dr. Ricky.
