Shillong, Jymmang 28
U nongap jaka ïeng kali bad arshaka ha shnong Domlakhiat kaba don harum Mawsahew, Sohra, Bah Wanphai u la sngewthikna ba ki shikurim kiba na Indore ha Madhya Pradesh kiba dang jah rngai haduh mynta ki la dep mih na Nongriat kaba ki sah bad na Domlakhiat namar ka arshaka (scooty) kam don shuh.
U la ïathuh ba kine shikurim ki la wan poi da ka arshaka ha ka por 1:30 mynsngi ha ka 22 tarik Jymmang. Haba ki la dep siew ka bai pynïeng kali ha ka dor 30 tyngka ki la leit sah miet sha Nongriat hynrei la ïoh jingtip ba ki la mih na jaka sah na Nongriat ha ka por 7:00 baje mynstep ha ka 23 tarik Jymmang 2025 hynrei um shym la tip katno baje ki mih na Domlakhiat namar ki arshaka ki bun kiba ïeng.
Haba u nonglum khubor u la poi ha Domlakhiat ha ka Sngi Balang la ïohi ba ki pulit hapoh ka jingïalam u Bah Vivek Syiem, Superintendent of Police ka East Khasi Hills ki dang ïa ap ïa ki pulit kiba dang leit wad sha Nongriat hynrei ym shym la lapdien.
Ha kane ka sngi u Rangbah Shnong Domlakhiat, Bah America Rnga ruh u la ïadonlang bad la phah ïa ki dkhot ka shnong ban leit wad lang.
U Bah America u la pyntip ba kine ki shikurim ki la mih na kane ka shnong ha ka 23 tarik mynta u bnai namar ka arshaka ba ki pynïeng kam don shuh.
U la pyntip ba nangne shakhmat ka shnong kan hap da pyrkhing ïa ki briew kiba wan kai sha Nongriat ban shngaiñ ka leit ka wan. U la ïathuh ba kine ki shikurim ki la ïalam ïa uwei u samla sha Nongriat ban ïalam lynti hynrei mar shu ïoh jaka sah, ki la siew noh ka pisa ban phah leit phai noh.
Shuh shuh, u la ïathuh ba don ki nongjngohkai kiba wan ïaid na Domlakhiat bad don kiba ïaid na Tyrna namar ka jingjngai ka long kumjuh ban poi sha jingkieng jri ba ar mala kaba don ha Nongriat.
Kumjuh, ki pulit jong ka Sohra ki la hiar biang ha kane ka sngi sha Nongriat kaba don ki jingkieng jri ban leit wad biang ïa ki shikurim kiba na Indore.
Ki pulit kiba kynthup naduh ki SDRF, ki Emergency Fire Service na Sohra ki la hiar sha Nongriat lyngba ka shnong Domlakhiat kaba ïaid na Laitduh, Mawsahew namar kine ki shikurim ki buh ïa ka scooty sha Domlakhiat ha ka por ba hiar sha Nongriat ha ka 22 tarik mynta u bnai.
Ha kane ka sngi u Bah Vivek Syiem, Bah P Syiem, SDPO ka Sohra Civil Sub Division ki la hiar lang sha Domlakhiat ban wad ïa kine ki shikurim ryngkat ka jingïadonlang ki bahaïing jong kine shikurim.
Ha kane ka sngi ki pulit ki la phah ringdur ruh da u drone ïa ki riat ki ram, ki khlaw ki btap hynrei ym shym la lapksai. Kane ka jingbym lapksai ïa kine shikurim ka la pynsah umdum ïa ki pulit namar ïa ka scooty ba ki ñiah ha Domlakhiat la lap ha Sohrarim ha kine ki sngi.
Kum ban shu pynkynmaw, kine ki shikurim kita ka Sonam Raghuvanshi bad u Raja Raghuvanshi ki la wan shangkai pyngngad sha Sohra hadien ba ki la dep ïathoh shongkurim ha ka 11 tarik mynta u bnai bad 20 tarik Jymmang ki la mih na Madhya Pradesh ban poi sha Guwahati ban leit sha Shillong bad ha 22 tarik ki la poi sha Nongriat.
Na ka liang ki bahaïing ki la pyntip ba ki la ïoh ban phone khatduh ha ka step jong ka 23 tarik Jymmang 2025.
Ka jingbym lapksai ki pulit ïa kine shikurim ka la buh ïa ki bahaïing ban sah ha ka umdum.
