Mawkyrwat, Jymmang 28
Ki paidbah ka shnong Lawblei lem bad ki pulit jong ka Mawkyrwat ki la pynlong ïa ka jingleit wad ïa ka met jong u Bah Saiñkupar Lyngkhoi, uba la hap ha ka Wah Umngi naduh ka Sngi U Blei jong ka 25 tarik u Jymmang 2025 hynrei haduh mynta kim pat lap dien satia ïa ka met jong u.
Lah ban pynkynmaw ba u Bah Saiñkupar Lyngkhoi, 22 snem ka rta u la hap shapoh ka wah ha ka por kumba 7 baje eiei janmiet katba u dang leit tong doh bad ki para shnong ha kawei ka thwei kaba tip kum ka Shar-Shar kaba jngai kumba 2 km eiei na ka surok bah Mawkyrwat, Shillong bad la suba jur ba u la shah rong ha ka um.
Katkum ka jingïathuh jong u Secretary ka Shnong Lawblei, Bah Srinly Syiemlieh, u la ïathuh ba ki bor shnong ki la pynlong ïa ka jingleit wad paidbah man ka sngi ha katei ka wah ban lap ïa ka met hynrei haduh mynta kim pat lap dien satia.
U la ïathuh ruh ba ka jingbym ïoh ïa ka met lehse ka lah ban dei ba u la sahkut shapoh um namar katei ka jaka ka dei kaba long krem shapoh bad ka dei ruh ka jaka riat bad ka jaka kaba eh shibun ban leit ngam.
