Shillong, Jymmang 28
Ha ka durkhih kaba jrong kumba 27 second kaba la ïoh da kawei na ki lad pathai khubor ha ka nohphai sngi jong ka 28 tarik u Jymmang, 2025, la ïohi ba ki lai ngut ki briew kiba dang muja ka dung thyrnia injek drok ïalade.
La ïohi ba kitei ki lai ngut hapdeng u slap, ki la shong hajan uwei u Transformer ha ka jaka kaba i jakhlia bha.
Ha katei ka durkhih la ïohi ba ar ngut na ki, ki dang injek ïalade ha ki ksang kti jong ki katba uwei pat u dang ap la ka pali bad ka dih sikret.
Haba wad ïa katei ka jaka la shem ba ka dei harud surok ka Keating Road ha ka lynti na ka lad sha Lady Keane’s College.
Ym shym la lah ban ithuh dur khmat ïa kitei kiba pyndonkam injek thyrnia drok namar ïa ka durkhih la ring na ki bynta na jrong ka ïing mala.
