Shillong, Jymmang 28
Ka PV Sindhu kaba la jop ar sien ha ka Olympic bad u HS Prannoy ki la poi sha ka wat ba ar jong ka lympung Singapore Open Super 750 ha la ki jong ki jingjop ha ka Sngi Ba-ar. Ka Sindhu ka la ïakhun wut-wut ha ka jingïalehkai pyrshah bad ka Wen Yu Zhang na Canada ban jop da 21-14, 21-9 tang hapoh 31 minit. Ka jingïakhun kaba kham eh ka ap ïa kane ka lahduh barim jong ka pyrthei ha ka wat ban wan, ha kaba kan ïakhun pyrshah ïa ka nongjop takma ksiar ha ka Olympic ha Tokyo bad kaba don ha ka kyrdan ba san ha ka pyrthei mynta, ka Chen Yu Fei na China. Katba u Prannoy uba don ha ka kyrdan ba 34 ha ka pyrthei, u la hap ban ïakhun tyngeh na ka bynta kane jingjop. Une u rangïalehkai 32 snem ka rta u la ïakhun pyrshah ïa u Rasmus Gemke jong ka Denmark, da ka jingïalehkai kaba la i shitom hynrei suki-suki u poi sha ka jingjop da 19-21, 21-16, 21-14. Un ïakhun pyrshah ïa u Christov Popov na ka France ha ka wat ba 16.
Hynrei ka la long ka sngi kaba pynduh jingkyrmen ïa kiwei pat ki kynhun ïalehkai ka India ha kaba ka Malvika Bansod, u Anmol Kharb, u Priyanshu Rajawat, bad u Kiran George baroh ki la shah rem ha la ki jong ki jong ki jingïalehkai.
Ka Malvika ka la shah rem da 21-14, 18-21, 11-21 ha ka Supanida Katethong ka Thailand, katba u Priyanshu u la shah rem da 21-14, 10-21, 14-21 ha u nong Japan u Kodai Naraoka ha ka jingïakhun kaba la neh haduh shi kynta.
U Anmol u la shah pynliem noh ha u Chen. Utei u nong India u la pyni ïa ka jingkhlaiñ ha ka jingïalehkai ha ka wat kaba ar shwa ban shah pynphai kylla da 11-21, 22-24.
U George uba la poi sha ka quarterfinal jong ka India Open ha kaba sdang jong une u snem, u la shah pynliem noh ha u Weng Hong Yang na China da 19-21, 17-21, katba ka R. Santhosh Ramraj ka la shah rem noh ha ka jingïakhun para-marwei da 14-21, 8-21 ha ka Kim Ga Eun na South Korea.
Ha ka jingïalehkai mixed doubles, ki shi-jur ka ri India u Dhruv Kapila bad ka Tanisha Crasto ki la shah pynliem da 18-21, 13-21 ha u Cheng Xing bad ka Zhang Chi na China.
Nangta, u Ashith Surya bad ka Amrutha Parmuthesh ki la kut ka jingïaid lynti ha ka jingïakhun ha kane ka lympung lyngba ka jingshah rem da 11-21, 17-21 ha ki nong Japan u Yuichi Shimogami bad ka Sayaka Hobara.
Ka jingïakhun ar ngut jong ki kynthei kiba long ka Kavipriya Selvam bad ka Simran Singh kam shym la long ei-ei satia ha ka jingïakhun pyrshah ïa ka Baek Ha Na bad ka Lee So Hee na Korea, ha kaba ki la shah rem suk da 4-21 9-21.
