Shillong, Jymmang 28
Ka Chairperson ka Meghalaya State Commission for Protection of Child Rights (MSC PCR), ka Agatha Sang-ma ha ka Sngi Balang ka la ong ba ka tnad ka ïatreilang bad ki pulit bad la dep ban phah ruh ïa ka dur-khih haba ïadei bad u runar ba leh khlemakor ïa ka khynnah skul sha ka ‘Forensic Laboratory’.
“Ngi ïatreilang bad ki bor synshar bad nga la ïakren bad u SP bad ki dang ïaleh katba lah ban wad ïa une u briew bad ïa ka dur-khih la phah sha ka ‘Forensic Lab’ ban pyntikna ha ka ban lap bad pynithuh ïa une u briew,” ong ka Sangma haba kren sha ki nongthoh khubor.
Ka la ong ruh ba namarba utei u briew u la deng ïa ka jingkah dur khmat, ha kawei ka liang, ka long kaba eh ban ithuh dei mano, hynrei na ka liang ki pulit ka la ïaid shakhmat bad kane ka kam.
“Ngi kum ka Commission ruh, ngi la ïakren bad ki bor ba dei khmih ban pyntikna ban wad bad lap ïa u runar bad ban pynshitom ïa u katkum ka aiñ,” ka la ong.
Kum ban shu kdew hangne, ka dur-khih halor ka jingleh khlemakor jong uwei u runar ka la saphriang ha ki rynsan lad pathai bad kane ka la pynkyndit ïa baroh, naba kum kane ka jingjia kam pat ju jia koit.
Katkum ka dur-khih ba la ïoh ring lyngba ka kor CCTV jong kawei ka ïing, la ïohi ba utei u runar uba la kah durkhmat, u la leh ïa katei ka kam kaba ijli haduh katta-katta, kaba la ktah ïa ka longrynñïeng jong kawei ka khynnah skul.
Ha kane ka dur-khih, la ïohi ruh ba une u runar u la bud nadien jong kawei ka khynnah skul kaba dang ïaid la ka jong ka lynti bad ynda u la poi hajan, u la khyllied ïa ka skad jong ka bad shondur.
Katei ka jingjia ka la jia ha ka step Sngi Thohdieng (jong ka taïew ba la dep) ha Umsohsun.
Haba ban jur ban burom ïa ka jinglong shimet jong ka khynnah skul kaba la ngat ha katei ka apot, ka Chairperson ka la pynpaw ka jingsngewsih halor kiba kum kine ki jingjia kiba wan jia bad pynsngew ba kiba kum kine ki jingjia ki dei ban sangeh noh shi syndon.
Ha kajuh ka por, haba kyntu ban ym pynsaphriang ïa katei dur-khih, ka la ong, “Dei ban pynshitom ïa kito kiba pynsaphriang, namar kane ka dei ka khynnah rit kaba leit skul bad ka long ka jingjia kaba pynkyndit ïa ka ba kan hap mad ïa kaba kum kane bad lada ngi ai lad khlem leh eiei ïa une u briew, kata kan ym don jingsangeh hadien-habud, kumta dei ban pynsangeh ïa kane.”
Haba kylli, ka la ong ba la dep ban phah ïa ka dur-khih ban pynithuh bad khmih bniah khnang ban lap ïa ka jingpynithuh jong utei u runar.
Shuh shuh ka la bynrap, “Ngi ïatreilang bad ki pulit wat la ïa ka jingtohkit yn leh da ki pulit, ngi kyrshan lang iwei-ïa-iwei haba ïadei bad kane.”
