Australian, Jymmang:
Kawei ka nongthaw aiñ kaba dei na ka jaitbynriew Muslim, ha ka Sngi Balang ka la phla bad ujor halor ka jingshah don bor ha ki shynrang para ba iatreilang, ha kaba ki la pynbor ia ka ba ka dei ban dih kumba dih ma ki bad ba kan shad halor ka miej iadih jong ki ha ka jingjia kaba dang shu jia shen.
Ia katei ka briew la ju ithuh kum ka Fatima Payman, bad ka la phla ba ka dei ka briew ka bym ju dih- ju bam bad kam ju dih khamtam ia ki jingdih kiba pynbuaid.
Hynrei ha katei ka sngi ba don ka tamasa ba kyrpang jong katei ka tnat ba ka trei, uwei na ki para nongtrei lang bad ka, u la pynbor ia ka ba kan dih ia ka waiñ bad ka jingdih ba ki iadih ha katei ka jaka bad u la pynbor ruh ia ka, ba kan shad halor ka miej iadih kaba don ha katei ka jaka dih.
Wat la katta, katei ka briew kam shym la pynshai mynno kane ka la jia bad mano utei u briew uba pynbor ia ka ban leh ia katei ka kam.
Ia ka Payman, la kha ha Afghanistan bad ka long ka Myntri ba nyngkong eh jong ka sorkar Australia ban shong hapoh ka iingdorbar thaw-aiñ ryngkat bad ka jaiñkup ‘hijab’.
Haba iadei bad kane ka jingjia, ha u snem 2021 pat, kawei ka briew kaba la ithuh kum ka Brittany Higgins, ka la ujor ba ka la shah batbor ha ki para ba iatreilang badka hi hapoh ka kamra ophis jong ka iingdorbar thaw-aiñ, ha kaba, kane ka jingjia ka la wanrah ia ka jingiakhih kaba jur ha kylleng jong katei ka ri ha utei u snem.
Hadien ba ki bor ka aiñ ki la wad bniah bha, la shem ba katei ka iingdorbar thaw-aiñ jong ka Australia, ka dei kaba ju bun sa tang ki tamasa leh kmen bad ka jing-iadih- iabam kaba jur, ha ryngkat ki kam khlemakor bad ka jing-leh bor ia ki kynthei kiba iatreilang bad kiba long ki dkhot jong katei ka iing thaw aiñ.
