Shillong, Jymmang 28
U Carlo Ancelotti u la phong da ka tupia jong ka Brazil hadien ba u la poi ha Rio de Janeiro ha ka Sngi U Blei bad kane ka long ha shwa ba un shimti kum u coach ba thymmai jong kane ka kynhun.
U Ancelotti u la long uba nyngkong eh kum u coach nabar ri ban shimti kum u coach ba pura ïa katei ka kynhun kaba la rah ïa ka nam lahduh haduh saw sien ha ka World Cup.
Utei u coach uba na Italy, 65 snem ka rta, uba la poi ha Brazil ha shwa ka por 9 baje mynmiet ryngkat ka kynhun ki nonghikai, ha kaba yn sa pynbna ïa ka kynhun jong u na ka bynta ar tylli ki jingïakhun ban ïaknieh rung sha ka World Cup na South America ha u bnai ban wan pyrshah ïa ka Ecuador bad ka Paraguay.
U Ancelotti u la poi tang katto katne kynta hadien ba u Samir Xaud u la shah jied na ka bynta saw snem kum u President jong ka synjuk ïalehkai phutbol ka Brazil.
Ka elekshon ha ka Sngi U Blei ka la pyni ïa ka jingkut jong ka jingïakhih kaba jynjar, hadien ba la weng noh ïa u Ednaldo Rodrigues na ka kam kum u president jong ka CBF. Dei u Rodrigues uba la wanrah ïa u Ancelotti na ka Real Madrid.
U Ancelotti, uba ka jingïateh soskular bad ka Brazil ka ban neh haduh ka World Cup ban wan, u la khmih lynti ba un ïakynduh ïa ki nongïalam ka CBF, shwa ba un ïakynduh ïa ki lad pathai khubor jong katei ka ri.
