Jowai, Jymmang 28
Ka Ummulong CC ka la rah ïa ka nam lahduh da kaba pynrem ïa ka Mowkaiaw CYC da 4-wicket ha ka phianal jong ka lympung ïalehkai District Cricket League ba la pynïaid da ka West Jaiñtia Hills District Cricket Association ha ka 28 tarik Jymmang.
Haba phai sha ka jingïakhun, ïa ka jingkynting pisa la jop da ka Ummulong CC kaba la kam trai shwa ban bol . Ka Mowkaiaw CYC haba wan tied nyngkong ka la ïoh 102 run na ki 20 over bad liem 9 wiket.
Napdeng ki nongtied ka Mowkaiaw CYC dei tang u Kishan Lyngdoh marwei uba ïalehkai bha da kaba tied 61 run na ki 50 bol ryngkat 5 tylli ki Six bad 4 tylli ki Four. U Heimonlang Lyngdoh, nongkawang bol jong ka Ummulong CC u la ïoh ban pynhap 3 wiket na ki 4 over bad ai tang 5 run.
Ka Ummulong CC ha ka pali ban wan beh ïa ka thong ka la lah ban pynjop da kaba ïoh 105 run na ki 18.3 over bad liem 6 wiket.
U Sylvester Mylliempdah u la tied 37 run (khlem khyllem) na ki 52 bol ryngkat 3 tylli ki Fours, u Chongtre I Man Lamare pat u la noh synniang 28 run na ki 17 bol ryngkat 3 tylli ki Six bad kawei ka Four. U Kitboklang Lyngdoh, nongkawang bol jong ka Mowkaiaw CYC u la ïoh ban shim 3 wiket na ki 4 over, u Kishan Lyngdoh pat u la ïoh ban shim 2 wiket na ki 4 over.
Ïa ka nam ‘Player of the Match’ la ïoh da u Heimonlang Lyngdoh jong ka Ummulong CC uba ïalehkai bha ha ka liang kawang bol.
La sam ruh ïa ka nam Best Batsman jong kane ka League ha kaba u Devention Lyngdoh (235 run na ki 6 innings) jong ka West Jaiñtia Police CC u la ïoh ïa kane ka nam da kaba ïoh bun run eh na baroh ki nongtied ha kane ka League.
Ïa ka nam Best Bowler la ïohpdiang rah da u Heimonlang Lyngdoh (19 wickets na ki 7 innings), u nongkawang bol jong ka Ummulong CC uba ïoh ban pynhap bun wiket ha kane ka League.
La sam ruh ïa ka nam Player of the League ba la ïohpdiang da u Devention Lyngdoh jong ka West Jaiñtia Police CC.
Ïa ki khusnam la sam da u Ma Eddystone Shylla President ka West Jaiñtia Hills District Cricket Association ha ka jingdonlang u Ma Arwotki Sumer bad Ma Isaia Muksor, Vice-Presidents West Jaiñtia Hills District Cricket Association, Ma Waiborlang Sohlang, General Secretary West Jaiñtia Hills District Cricket Association nalor kiwei de ki dkhot ka WJHDCA.
