Jowai, Jymmang 28
Bunsien ki khynnah pule ki shad kmen haba ki pass ïa ka eksamin matrik. Hynrei mynta ka kynti, ha rilum Jaiñtia kiba bun ngut ki khynnah pule kiba wan na ki longïing baduk bad kiba dang shu pass matrik ki la jaw ummat da ka jingkhuslai namar haduh mynta kim pat ïoh klas satia ha ki skul Sorkar kumba ki khmih lynti.
Ka tnat Pule Puthi jong ka Sorkar Jylla ka la pynbeit ryntih ba ka klas XI kan sdang noh naduh 2 tarik u bnai Jylliew mynta u snem. Hynrei ka jingbym ïoh klas wat haduh mynta ka la pynlynga mynsiem ïa ki khynnah pule.
Halor ka jingbym ïoh klas ki khynnah pule, ka Jaiñtia Student’s Union (JSU) ka la pynlong da ka jingïakhih shong kyllaiñ myngor ha Lad Kolej, Ladthadlaboh, Jowai ha ka 28 tarik Jymmang.
La wan shim bynta da ki khynnah pule ryngkat ka jingsynran lang ki kmie ki kpa nalor ki bahaïing bahasem.
Ha kane ka jingshong kyllaiñ myngor, la rah lang ruh ïa ki jingthoh ‘banner’ kiba thoh, ‘Ka CM Guide Book ka ai jingkyrmen, hynrei ka jingbym ïoh rung klas ka ai jingsngewsih. Ka Sorkar ka ai kot, hynrei ka rem ban ai jaka pule. Ka kot ka don ha kti, hynrei ka klas ka dang khang. Sorkar MDA sangeh noh ban pynslem ïa ki jingphohsniew, ka pule puthi ka dei ka hok ym ka jingdon bok.
Katto-katne ki khynnah pule haba shim bynta ha ki jingkren ryngkat ka jingjaw ummat ki la ong, “Ngim ïoh ban leit pule ha ki skul ba pynïaid da ki ‘riewshimet namar ym don nongkyrshan ïa ngi naba ngi wan na ki longïing longsem baduk. Ngi duh-thiah duh-dem haba ngi pyrkhat ïa ka jingduh klas ka jong ngi.”
Namar kata, ki la kyntu ruh ïa ka Sorkar ban wad ki lad ki lynti ban ïarap ïa ki khnang ba kin ïoh ban bteng biang ïa la ki jingpule. Kawei pat ka longkmie ka la kyntu ïa u MLA ka Jowai Ma Wailadmiki Shylla ba un sngewbha ban peit lem ïa ka jingeh jong ki khynnah pule. “Ïa ka kam ka jam ngim khmih lynti hynrei ai shwa ïa ki, ka jingstad namar ki dang thrang ban pyndep ïa ki jingpule,” ka la ong.
Nalor ki khynnah pule bad ki longkmie, la ïoh ruh ka jingkren na u President ka JSU Jersom Shylla, u General Secretary barim ka JSU Treiborlang Suchen, u General Secretary ba mynta u Nielkee Mukhim, u Vice President Ryngkat Diengdoh nalor kiwei kiwei.
Baroh ki nongkren ki pynpaw ka jingsngewdiaw namar ka jingbym ïoh klas ki khynnah ha ki skul ba pynïaid da ka Sorkar ha West Jaiñtia Hills District.
U samla Jersom Shylla ha ka jingkren u la ong, kane ka jingeh duh klas ki khynnah pule ha rilum Jaiñtia la mad naduh u 2013 ha ka por ka jingsynshar ka Sorkar MUA ba ïalam da u Dr. Mukul Sangma bad dang ïai mad sah haduh ka Sorkar kaba mynta ba ïalam da u Conrad K Sangma.
U la ong ruh hadien ka jingpass bha jong ki khynnah, na ka liang ka Sorkar lyngba ka tnat Education ka la ong wat khuslai ki seat na bynta ki khynnah pule ki la biang hynrei ngi pynpaw pat ka jingsngewsih namar haduh mynta ka Sorkar ka kut tang ha ka jingkren. U la kynthoh ruh ïa ka Sorkar halor ka jingpynlut da ki klur tyngka ha ki tamasa hynrei kam don pisa pat ban siew tulop ïa ki nonghikai.
Hadien ba ka JSU ka la ïakynduh bad u Myntri Rangbah ka Jylla Conrad K Sangma ka kyrmen ba la lah ban pynurlong ïa ki jingai jingmut ban sdang noh ïa ka klas step ne morning shift ha Govt. Boys Higher Secondary School Jowai bad ka klas janmiet ne ka evening shift ha Kiang Nangbah Govt. College, Jowai khnang ban lah ban pdiang klas kham bun ngut ki khynnah pule, hynrei ka Sorkar kam shym la shimkhia kumba la kular, la ong u Jersom.
Ka JSU ka kular ruh ïa ki khynnah pule ba katba kim pat ïoh klas kan ym shongthait kan ïaid shakhmat ban dawa ïa ka hok ki khynnah. Hadien kane, ka bor district ka la khot ïakren ïa ki nongïalam ka JSU, pynban kane ka jingïakren kam shym la pynhun satia ïa ki nongïalam ka JSU.
Ka Jaiñtia Students’ Union (JSU) ka la pynpaw ruh ïa ka jingbynñiaw kaba khraw halor ka jingbym don por u DC ban ïakren bad ki dkhot nongïalam ka seng halor ka mat pynrung klas ïa ki khynnah pule ha Kiang Nangbah Govt. Sec HSS bad Govt. Boys’ HSS.
Kumta, ka la pynbna ban bteng biang ïa ka jingïakhih katba ka Sorkar kam lah ban weng ïa ka jingeh ki khynnah pule bad ban pynrung klas ïa baroh ki bym ïoh klas ha Rilum Jaiñtia.
