Shillong, Jymmang 28
Wat hadien hynriew sngi kynthih ba la ïaid hynrei ka jingïai thwet da ki bor pulit ïa u briew uba la leh khlemakor ïa kawei ka khynnah skul ha Umsohsun ka dang ïaid shakhmat.
Kum ban shu pynkyn -maw hangne ba kawei ka khynnah skul ka la shah leh khlemakor ha uwei u samla briew uba la kah durkhmat ïalade kaba la jia ha ka shnong Umsohsun ha ka por 6:30 mynstep jong ka 23 tarik u bnai Jymmang, 2025, ha kaba utei u briew u la khyllied kynsan ïa ka skad jong katei ka khynnah skul bad ring durkhih ruh.
Hynrei ka dei ha ka 24 tarik u bnai Jymmang, 2025, ba katei ka jingjia ka la paw pyrthei lyngba ka jingsaphriang jong ka durkhih ha kylleng ki rynsan ‘social media’ ïa kaba la ïoh ban ring da ki kor CCTV Camera na kawei ka ïing briew kaba don ha Umsohsun.
Ha katei ka durkhih, la ïohi ba utei u briew uba riam khuid bha ha ryngkat ka jingphong ïa ka jingkah durkhmat, u la hiar bad kiew na ki mawkyndon kiba don ha Umsohsun hajan ka YMCA Mawkhar, u la leit ban khyllie kynsan ïa ka skad jong kawei ka khynnah kynthei kaba dang thmu ban leit sha skul bad ban ring durkhih ïa ka bad la ïohi ba ym tang kane ka khynnah kaba la ngat ha kane ka jingshah leh khlemakor hynrei la sakhi ruh ba ha katei ka durkhih kaba jrong kumba 1 minit 50 sekhon, kawei pat ka khynnah skul ka la phai shadien ban peit ïa utei u briew bad lehse kane ka khynnah ruh ka la shah leh lang kumjuh kumba shah leh lem katei kawei ka khynnah.
Ha ka janmiet jong ka 28 tarik Jymmang, 2025, kawei ka dur kaba shai bha ïa kaba la suba ba ka lah ban dei ka dur jong utei u briew uba leh khlemakor ïa katei ka khynnah skul, ka la saphriang ha kylleng ki rynsan ‘social media’ bad na ka liang ki paidbah ki la kynnoh ba kane ka dur ka dei jong utei u briew.
Ha kane ka dur, la ïohi shai kdar ïa ka durkhmat jong utei u nongsuba uba dang ïeng bad uba khlem kah durkhmat satia ïalade.
La ïohi ruh ba utei u briew ha katei ka dur, u la phong da ki jaiñ kiba ïasyriem thik kumba phong utei u nongleh khlemakor ha ka durkhih ba la ïoh ringdur da ki kor CCTV Camera bad uba don ruh ïa kajuh ka jingïasyriem ha ka durkhmat.
Kumta ban pynthikna halor kane ka dur la u dei ne um dei utei ujuh u briew uba la donkti ban leh khlemakor ïa ka khynnah skul, na ka liang U Nongsaiñ Hima u la ïoh ban ïakren bad u Superintendent of Police (SP) ka East Khasi Hills District ha ka 28 tarik Jymmang, 2025, u Bah Vivek Syiem uba la ong ba na ka liang ki bor pulit ki dang ïai thwet ban ïoh kem ïa utei u briew wat haduh kine ki sngi kiba mynta ruh bad ong ba ki bor pulit ki dang khmih sani bha halor katei ka dur ban pynthikna la u dei ne um dei u juh u briew.
