Shillong, Jymmang 28
Ar tylli ki ïing kiba don ha nongbah Shillong ki la shah prong tuh ha ki runar bad kumjuh ruh ki waïar bording ba pyndonkam ha ki pump um ki la shah tuh.
Katkum ka khubor kaba la ïoh na ki pulit la ong ba ka Sharda Verma ka la ai ka jingujor ba ha ka 26 tarik mynta u bnai, ha ka por kumba 4 baje dang step, uwei u runar bym lah ban ithuh, u la prong tuh hapoh ka ïing ka jong ka, kaba don ha Laitumkhrah, Shillong bad ban tuh ïa kawei ka bicycle.
Ha ka jingtohkit bad buddien halor kane ka jingjia, na ka liang jong ki pulit ki la ïoh ban kem noh ïa uwei u briew ba la tip kyrteng kum u Damanbha Ryngksai ba la 29 snem ka rta.
Ha kawei pat ka khubor, u Rajiv Deka u la ai ka jingujor sha ki pulit ba ha ka 24 tarik mynta u bnai ha ka por kumba 10.28 mynstep, uwei u runar bym lah ban ithuh u la prong tuh hapoh ka ïing ka jong u, kaba don ha Nongmensong Umkdait, Shillong bad ban rah tuh ïa ki ar tylli mobile phone. Ïa kane ka jingjia shah tuh baroh, la ïoh ban ring dur ha ka kor CCTV.
Ha kawei pat ka khubor, na ka liang jong u Secretary ka Shnong Mawpat Pyllun, u la ai ka jingujor sha ki pulit ba ha ka 26 tarik mynta u bnai, ha ka por 7 baje dang step, ki runar bym lah ban ithuh ki la tuh ïa ki waïar bording bad ki fuse na ka ‘water reservoir’ ne ka jaka pynlang um jong ka shnong kaba don ha Mawpat Mawkiang ha East Khasi Hills.
La ong ba kane ka jingshah tuh jong ki waïar bad ki fuse, ka la wanrah ka jingktah kaba jur ha kaba ïadei bad ka jingsam um bad kaba la buh jingma ruh ïa ka koit ka khiah bad ka khuid ka suba jong ki paidbah.
