Shillong, Jymmang 29
Ka jingpynkhreh ïa ki lympung ïalehkai District Level Inter School Subroto Mukherjee Cup Football Tournament, 2025 ban pynlong da ki shlem treikam jong ki District Sports Officer (DSO) ha kylleng ki district jong ka Jylla ki dang ïaid shaphrang.
Ïa kane ka lympung yn phiah sha ki lai tylli kyrdan ïalehkai, kita ka Under-15 ki shynrang, ka Under-17 jong ki kynthei bad shynrang.
Hadien ba la dep jurip bniah (screening) ïa ki rta jong ki khynnah ïalehkai, ka Shillong (East Khasi Hills) bad ka Jowai (West Jaiñtia Hills) kin dei kiba nyngkong eh ban sdang ïa kane ka lympung naduh ka 2 tarik u Jylliew.
Kat kum ka jingïoh lum jingtip la ong ba ïa ka jingbishar bniah ïa ki rta jong ki khynnah ha East Khasi Hills la pynlong ha ka sngi Balang (28 tarik mynta u bnai). Te kumta kane ka shlem treikam kan sdang shwa ïa ki jingïalehkai na ka bynta ki kyrdan ïalehkai Under-15 (boys) bad ka Under -17 (girls) ha Madan Heh Mini Stadium kaba ha Mawlai Phudmuri, katba ïa ka Under-17 (boys) yn sdang ha ka 4 tarik u Jylliew ha madan ïalehkai jong ka SAI Training Centre kaba ha NEHU.
“Ha ka Under-15 ki shynrang ki don 16 tylli ki skul ki ban wan shim bynta, ha ka Under-17 ki shynrang ki don 23 tylli ki skul bad 7 tylli ha ka liang ki kynthei.”
Kumjuh, ha West Jaiñtia Hills yn sdang naduh 2 haduh 13 tarik u Jylliew ha Kiang Nangbah Stadium, Dongmihsngi Ladthadla -boh, Jowai bad ha Wahïajer Multi Sports Complex kaba ha Wahïajer.
Ha ka Under-17 (girls) ki don 15 tylli ki kynhun kiba kynthup ïa ka Kiang Nangbah HSS, On and On SS, Krist Syiem SS, Mukhla Raij HSS, Achievers SS, Police Public SS, Ummulong Presby-terian HSS, Mihmyntdu R.C Eve SS, Little Flower HSS, H.K. Singh Memorial SS, St. Dominic HSS, Govt. Girls HSS, Jaiñtia HSS, Govt UP RMSA SS bad ka North Liberty HSS.
Ha ka Under-15 (Boys) ki don 27 tylli kiba kynthup ïa ka St. Dominic HSS, Jaiñtia HSS, Jowai District Presbyterian SS, Seiñraij HSS, Little Flower HSS, All Saint Diocesan SS, Marian Hill HSS, Jowai Public School, Amlarem UPS, Mihmyntdu SS, Ka Syiem Jingsuk SS, Padu HSS, Police Public SS, H.K. Singh Memorial SS, Govt. Boys HSS, Achievers SS, Thangbuli UPS, Lumpyrtuh SS, Mukhla Raij HSS, Don Bosco SS, Ummulong Press HSS, K.J.P Synod Mihngi HSS, Mihmyntdu R.C Eve SS, Laishnong HS, Thadlaboh Presbyterian HSS, Ïalong SS bad ka North Liberty HSS.
Haba kaba ïadei bad ka Under-17 (Boys) ki don 31 tylli kiba kynthup ïa ka Sawlyngdoh HSS, Jaiñtia HSS, Little Flower HSS, Lumpyrtuh SS, Amwi HSS Thangbuli, Tome Memorial HSS, H.K.Singh Memorial SS, Khimu-sniang Presbyterian SS, Mihmyn-tdu SS, Marian Hill HSS, K.J.P Synod Mihngi HSS, Albin Lamare Memorial SS, Adventist HSS, Laishnong HSS, Ummu-long Presbyterian HSS, Govt. Boys HSS, Kiang Nangbah HSS, On and On SS, Khasi Pnar SS, Rising Hill SS Mootyrchiah, Mihmyntdu R.C Eve SS, Nong-bareh Lyntiar SS, Govt. UP RMSA SS, Che’s Star HSS, St Dominic HSS, Mukhla Raij HSS, Wahïajer Presbyterian HSS, Achievers SS, Krist Syiem SS, Ka Syiem Jingsuk SS bad ka North LibertyHSS.
Ha kaba ïadei bad ka West Khasi Hills yn sdang naduh 10 tarik u Jylliew ha Nongstoiñ, katba ha Eastern West Khasi Hills yn sdang naduh 12 tarik u Jylliew ha Mairang.
Ha Ri Bhoi District la dep ban pynlong ïa ka jingjurip rta ha ka sngi Balang ha kaba baroh ki don 28 tylli ki skul ban ïashim bynta. Ha ka Under-15 ki don 22 tylli, Under-17 (boys) ki don 16 tylli bad ha ka Under-17 (girls) ki don 9 tylli. Te, kumta ïa kane ka lympung yn sdang naduh 10 haduh 17 tarik u Jylliew ha madan Umdihar, madan Chinchona bad ha NSCA Mini Stadium, Paham Syiem.
Haba phai sha ka East Jaiñtia Hills bad West Khasi Hills kim pat lah ban pynlong namar ki hap ban pyndep shwa ïa baroh ki jingdonkam. Ha East Jaiñtia Hills ka jingjurip ïa ki rta jong ki khynnah ka la sdang ha ka sngi Palei bad kan kut ha ka sngi Thohdieng, katba ha West Khasi Hills yn dang ap ïa ka jingpynrung kyrteng jong ki kynhun ki ban shim bynta ha kane ka lympung.
