Shillong, Jymmang 29
Ka Khasi Students’ Union (KSU) Mawlai Circle ka la ïoh ban beh krad noh haduh 32 ngut ki nongbylla bar jylla kiba la wan bylla ha ki bynta ka shnong Mawlai bad ki bym don satia ïa ki kot ki sla kiba biang.
Kane ka jingpynher krad ïa ki nongbylla bar jylla ka la long hadien ba na ka liang jong ka Organising Committee jong ka KSU Mawlai Circle ha ka 28 tarik bad 29 tarik mynta u bnai ka la pynlong ka jingkhynra ïa ki mynder kiba wan trei ha ki bynta jong ka shnong Mawlai ha ki thaiñ Mawlai Ïewrynghep bad thaiñ NEHU. Ha kane ka jingkhynra na ka liang ka seng ka la lap ba ki bar jylla kiba wan trei sha kine ki thaiñ kiba trei ha ki kam misteri bad shna pandal kim shym la d?n kino-kino ki kot ki sla ba biang, ha kane ka jingkhynra ka la ïoh ban pynher krad kumba 25 ngut na ki bynta jong ka NEHU bad kumba 7 ngut na ki thaiñ Mawlai Ïewrynghep.
Na ka liang ka seng ka la pynpaw ba kan dang pynjur ka jingkhynra ïa ki mynder katba ka Sorkar kam pat lah ban pyntreikam ïa ka ILP kaba long kum ka stieh ban ïada ïa ka jaidbynriew ritpaid bad kumjuh ïa ka jingbym pat pyntreikam ka Sorkar ïa ka Meghalaya Identification Registration (safety & security) of Migrant Workers 2025 Amendment. La pynkut ka kyrwoh khubor ba la pyllait na u samla Eddie Malngiang, General Secretary ka KSU Mawlai Circle.
