Ban kyntiew ïa ki nongrep, la plie pyrda ïa ka VKSAC ba 12 sngi kynthih

Nongstoiñ, Jymmang 29

Ka shlem treikam jong ka Krishi Vigyan Kendra (KVK) West Khasi Hills, Nongshillong ha ka 29 tarik u bnai Jymmang 2025, ka la ïoh ban plie paidbah ïa ka “Viksit Krishi Sankalp Abhiyan Campaign” kaba 12 sngi kynthih ha kaba u MDC ka Parïong Mathadraishan u Bah Powell Sohkhlet u la long kum kongsan, katba u Bah W Massar, MCS, BDO ka Mawthadraishan C&RD Block kum  Symbud Kongsan.

Kane ka prokram ka long ruh ban pynsngewthuh ïa ki paid nongrep halor ki buit stad thymmai halor ka rep ka riang bad ri jingri bad ruh ïa ki skhim bapher bapher jong ka Sorkar.

Ïa kane ka prokram la plie bad pynlong ha ka ophis Krishi Vigyan Kendra (KVK), West Khasi Hills, Nongshillong bad nalor ki kongsan ha kane ka sngi la donlang ki ophisar Sorkar na ka tnat jong ka Agriculture & Farmers’s Welfare (EWKH & WKH), Animal Husbandry & Veterinary Department (EWKH & WKH), Department of Fisheries (EWKH), DDM NABARD (WKH), Scientist jong ka Central Agricultural University (CAU), Kyrdemkulai, Scientist jong ka ICAR Umiam, bad ICAR-ATARI, Umiam, Bank Official na Punjab National Bank, Mairang, member jong FPO (EWKH) bad ki nongrep na EWKH & WKH.

Shuh shuh hadien kane, la sam ruh ïa ki symbai dohkha, bam dohkha bad shun sha ki nongrep ba la pyndep ka jingshah hikai na KVK.

Nangta, ha kane ka jingplie la buh ruh ïa lai tylli ki kali kiba kynthup lai kynhun (Team) ki ban leit rung sha ki shnong kumba la pynbeit da ka ophis ban leit ïakynduh ïa ki nongrep, ha kaba kawei ka kali lane team kan leit ha Sylleimynteng, Umjei, Mawroh, kaba ar ha Nongshillong, Mawkohngei, Umkrem bad kaba lai ha Wahrinong, Dombah, Domkseh.

Shuh shuh la ong ba ha Eastern West Khasi Hills bad West Khasi Hills Districts, yn pynlong ïa kane ka campaign ha 108 tylli ki shnong lyngba 9 tylli ki kynhun kiba kynthup ïa ki Scientists na ICAR, Central Agricultural University bad Krishi Vigyan Kendra (KVK), Department of Agriculture & Farmers’s Welfare, Animal Husbandry & Veterinary Department, Department of Fisheries, bank (PNB) lem bad ki member jong ki FPO bad ki nongrep kiba la paw (Progressive farmers).

Haba kren kum u kongsan u Bah Powell u la pynpaw ba ka Mawthadraishan ka long kaba donbok ban don ïa ka ophis KVK namar ba kane kan long ka jingmyntoi ïa ki nongrep ba lyngba ki jinghikai ban ïoh pyndonkam ha ka kam rep ba man la ka sngi.

U la ong ruh ba kum ki nongrep kim dei ban phai sha ka rukom rep kaba rim bad ban don ka jingsngew pher haba wan ki scientist ban ai ka jinghikai halor ka rukom rep thymmai namar lada ki leh katkum ka por mynshwa kane ka prokram kan long lehnohei.

U la kyntu ïa baroh ki nongrep bad lyngba ka jingtip kin sam lem sha kiwei pat ba kin ïa pyllait por khnang ba kan long ka jingïarap kaba khraw ha ki por ban wan ha kaba ïadei bad ka rep ka riang.

Kiwei kiba la kren ha kane ka prokram ki kynthup ïa u BDO ka Mawthadraishan, Bah WL Massar bad ka Senior Scientist KVK WKH ka Kong VJ Lyngdoh.