Shillong, Jymmang 29
U Bah Himalaya M Shang-pliang uba dei u nongaibuit ka tnat pule puthi jong ka Sorkar Jylla, mynta ka taïew u la aiti da ka work order ba T.4.50 lak ban shna ïa ki jaka leit bar ba thymmai ha ka skul Dangar Dombah Border Upper Primary School, kaba hap ha Mawsynram Block, East Khasi Hills District.
U Bah Shangpliang u la ïathuh ba u tang shu ïohi ïa kane ka khubor ba ki khynnah skul ki hap ban leit bar sha ki khlaw ki btap, mar-mar u la pynsngewsha u Myntri Rangbah u Conrad K Sangma bad u la mang haduh 4.50 lak ban shna jaka leit bar.
Ïa kane ka work order, u Bah Shangpliang u la aiti sha u President ba thymmai jong ka Managing Committee uba dei ruh u Rangbah Shnong ka shnong Dangar u Bah Ham Syiemlieh, kaba kot T.4.50 lak ïa kaba u la pynïoh lyngba ka Chief Minister Special Development Fund (CMSDF) ban shna ïa ki jaka leit bar na ka bynta ki khynnah skul bad ruh ïa ki nonghikai.
Halor ka kynrum-kynram bad ka jingshah pyndonkam bakla ïa ka ‘midday meal’ ne jingbam sngi jong ki khynnah kane ka skul, u Bah Shangpliang u la pynpaw ba ka Sorkar kan ym mab hynrei kan pynshitom katkum ka aiñ.
Kum ban shu kdew ba ki khynnah skul jong ka Dangar Dombah Border Upper Primary School, da ki phew snem kim ju ïoh satia ïa ka jingbam sngi ne ka midday meal katba ïa ka pisa kaba la kot kumba shi phew lak duna la dep ban sei da u Secretary barim jong ka Managing Committee jong kane ka skul.
Halor kane ka jingjia, u Bah Himalaya M Shangpliang uba dei u MLA barim ka Mawsynram u la pynpaw ba u diaw ka mynsiem hadien ka jingïohi ha ki lad pathai khubor halor ka jingshah pynïaid bakla da mano-re-mano ha kaba ïadei bad ka jingbam sngi jong ki khynnah skul.
U Bah Shangpliang u la ïathuh ba ka tnat pule puthi hadien ba ïohi ïa kane, mar-mar ka la phah ban pynlong ïa ka jingjurip bad tohkit halor kane ka jingjia bad bynrap ruh ba shen ka Sorkar kan sa shim ïa kino-kino ki lad ban shim kam ïa ki briew kiba donkti ban pyndonkam bakla halor ka mid-day meal.
Na ka liang jong ka Kong Bel Marbaniang kaba dei ka Principal bad ruh ka Secretary bathymmai jong ka Managing Committee, haba ai jingkren ka la pynpaw ka jingsngewnguh ïa u Bah Himalaya M Shangpliang uba la kloi ban ïarap da kaba pynïoh ban shna ïa ka jaka leit bar bad ruh ban dang pynbha thymmai noh ïa kane ka skul kaba la sdang ban jot bad pra ha kiba bun ki liang na ka bynta ka jingmyntoi ki khynnah skul.
