Shillong, Jymmang 29
U Bah Paul Lyngdoh uba dei u Myntri ka Sorkar Jylla bad ha kajuh ka por u Nongaiktien ka Sorkar u la ong ba ka jingpynbteng ïa ka jingkheiñ beaiñ pyrshah ïa ka seng kieng atiar ka Hynñiewtrep National Liberation Council (HNLC) sa san snem ka dei namar ba kane ka seng kam shym la ai ïa ka jubab kaba sngewtynnad halor ka jingïai khot ka Sorkar ban pynsdang biang ïa ka jingïakren ïasuk.
Haba kren sha ki lad pathai khubor ha ka Sngi Palei, u Bah Paul u la ong, “Ngi long kiba kloi ban ïakren. Ha ka jingshisha, ka jingïakren bad ka kynhun kan dei shi jam shakhmat ban weng noh ïa ka jingkheiñ beaiñ hynrei namar ba kim shym ai ka jubab kaba sngewtynnad, ka jingkheiñ beaiñ ka la bteng biang.”
Shuh shuh na ka liang jong u Bah Paul u la ong ba ka jingkhot ka dang bteng haduh mynta.
Ka UAPA Tribunal dang shen ka la hukum ban pynksan ïa ka rai jong ka Ministry of Home Affairs ban pynbna ïa ka HNLC kum ka kynhun beaiñ sa san snem.
