Shillong, Jymmang 29
Ka khlur ïalehkai tennis kaba bat ïa ka kyrdan ba nyngkong ha ka pyrthei, ka Aryna Sabalenka, ka la sdang da ka jingjop ïa ka Jil Teichmann na Switzerland ha ka French Open hadien ba ka la pynliem noh da 6-3, 6-1 na ka bynta ban jam sha ka wat balai ha ka Roland Garros.
Ka Sabalenka ka la sdang ïa la ka jingïakhun ban ïoh ïa ka jingjop ha Paris da kaba ka la pynliem ïa ka Kamilla Rakhimova ha ka wat banyngkong, hynrei kane ka ‘thei ïalehkai kaba 27 snem ka rta na Belarus ka la mad ïa ka jingïakhun kaba kham eh pyrshah ïa ka Teichmann, ka bym shym la ailad ban shah rem da kaba suk.
Ka Sabalenka ka la ïakynduh jingeh ha kaba sdang namar ka la shah pynïakhaid da 3-3, shwa ba kan pynkhyllem ïa katei ka nongïalehkai ka liang pyrshah.
“Ka la sdang bha shisha bad ka la ïalehkai bha ïa ka jingïalehkai. Ka long kaba eh bha ban ïakhun pyrshah ïa ka,” ong ka Sabalenka. “Ka jingpher jong ka, ka long kaba sngew lyngngoh. Nga la pyrshang ban ïakhun tyngeh bad nga sngewkmen ba nga la lah ban ïalehkai bha na ka bynta ban pynliem da 3-1. Ka dei ka jingïalehkai kaba eh, kaba la pynlong ïa nga ban ïoh bor bad nga sngewkmen shibun na ka bynta kane ka jingjop.”
Ha kawei pat ka jingïakhun, u Stefanos Tsitsipas, uba la rung final teng ha ka French Open, u la kynnoh ïa la ka jong ka jingbym long rangbah na ka bynta ka jingshah rem ha ka sien ba ar ha u Matteo Gigante na Italy ha ka sngi Balang bad u la ong ba u donkam ban leit phai biang sha ka lympung ïaknieh khnang ban wanphai biang sha Paris.
“Ngan pynpaw halor ka jingbym long rangbah, ka jinglah ban ïalehkai bha,” la ong u Tsitsipas hadien ka jingshah rem.
Une u rangïalehkai na Greece uba dang 26 snem, uba la rung semi final haduh hynriew sien ha ka Grand Slam, u la shah rem ha u rangïalehkai ba don ha ka kyrdan kaba 167 ha ka pyrthei da 6-4, 5-7, 6-2, 6-4.
“Nga sngew kumba ka jingpyrkhat jong nga ka la jah noh shipor bad ngam shym la don pura ha katei ka khyllipmat,” la bynrap ong u Tsitsipas ha ka jingïalang bad ki nongthoh khubor. “Nga la long kumba nga ïalehkai khlem da san bha ha ka jingmut jingpyrkhat.”
