Shillong, Jymmang 29
Namar ka jingsdang ban ïohi biang ïa ka jingdon ka jingkiew ki briew kiba shah ktah ha ka Covid-19 ha kylleng ki Jylla jong ka Ri India, Ka Myntri ba dei khmih ïa ka tnat ka koit ka khiah jong ka Sorkar Jylla, Kong Ampareen Lyngdoh ka la ong ba kum ki paidbah nongshong shnong jong ka Jylla kim dei ban don ïa kano-kano ka jingtieng-jingsmiej ne ka jingartatien haba ïadei bad u khñiang jingpang Covid-19.
Haba kren sha ki lad pathai khubor ha ka 29 tarik Jymmang, 2025, ka Myntri ka la ong ba ki paidbah ki don hapdeng ka jinglynga mynsiem hadien ba ki la ïohi ïa ka kaiphod ba u khñiang jingpang Covid-19 u la sdang ban pur biang ha ki katto-katne tylli ki jaka kiba don ha satlak ka pyrthei bad ruh hapoh ka Ri India, ki la don katto-katne tylli ki jylla kiba la ïoh ïa utei u khñiang jingpang.
“Lada kumno-re-kumno ka don kum kata ka jingjia hapoh ka Jylla, ngin pyntip na ka por sha ka por sha phi ki nongshong shnong kumno ban leh bad aïu donkam ban leh lada phi kylli na ngi, hato ki jaka sumar la ki dei ki Sub-Centre ne ki PHC ki la long ne em kiba pynkhreh ban ïaleh pyrshah ïa uta u Covid-19 lada u wan?,” ong ka Myntri.
Ka Kong Ampareen ka la ban jur ba ki paidbah kim dei ban khuslai mynsiem namarba hadien ka jingmad jong ka Jylla ïa ka jingkthang, ka Jylla ka la biang lut ïa ka jingpynkhreh lada wan lynshop biang ka khlam Covid-19.
“Phim dei ban khuslai namar hadien kato ka jingmad kaba kthang, ngi kum ka jylla ngi la biang lut ïa ka jingpynkhreh ban peit ba lada wan kum kata ka jingjia, ka jylla jong ngi kan ym don ka jingduhnong kumba ka la duhnong ha ki snem ba la dep,” bynrap ka Myntri.
