Shillong, Jymmang 29
Ka jingïakop ñiah lieng ba la tip kum ka 3rd YAI North East Regatta 2025 ka la poi sha kaba kut ha ka sngi Palei ha pung Umïam. Ha kine san sngi la sakhi ïa ka jingwan shim bynta jong bun ngut ki nongñiah lieng ban pynpaw ïa la ki sap.
Ha kane ka jingïakop ba la pynlong da ka Umïam Sailing Club (USC) bad ka UDAY Sailing Foundation ha ryngkat ka jingïatrei lang bad ka International 420 Class Association of India, kaba hap hapoh ka jingkhmih jong ka Yachting Asso-ciation of India (YAI) bad la kyrshan lang da ka tnat jngohkai jong ka Sorkar Jylla, ki la don haduh 81 ngut nongshim bynta na 9 tylli ki klob jong kylleng ka ri India kynthup 25 ngut ki kynthei.
U Doaydy T Sangma na ka Umïam Sailing Club (USC) u la ïohpdiang ïa ka nam Most Promising Sailor, katba ka National Sailing School (NSS) na Bhopal ka la ïohpdiang ïa ka nam Best Sailing Club da kaba khur 10 tylli ki takma bad u Shashank Batham (NSS) u la ïohpdiang ïa ka nam Col Jaggi Trophy.
Haba ai jingkren ha katei ka sngi, u Bah Paul Lyngdoh, Myntri ka tnad jngohkai pyrthei kum u kongsan u la ai khublei ïa ki nongñiah lieng, ïa ka kynhun pynïaid bad ki dkhot jong ka Uday Sailing Foundation. U la ong ka jingïakop ka la nang kiew manla u snem ha kaba kan khring shuh shuh ïa ki nongïashim bynta.
Lah ban kdew ba ka Umïam Sailing Club (USC), tang hapoh lai snem naduh ba la seng ïa ka, ka la lah ban pynmih ïa ka kynhun kaba don lai ngut ki nongñiah lieng mynta u snem. Kane ka lympung ka long ruh ha kajuh ka por ban jied ïa ki nongñiah lieng kiba kynsai ban mihkhmat ïa ka ri India sha ka Asian Games ka ban long ha u 2026.
Nalor u Bah Paul, kiwei pat kiba la don lang ha kane ka sngi ki long u Lt Gen TSA Narayanan, AVSM (Retd), Vice President ka Yachting Association of India; u Uday Bhan Singh Yadav bad ka Sarla Yadav, Directors jong ka UDAY Sailing Foundation, u Capt Jitender Dixit, Secretary ka YAI; Col Alok Yadav, Technical Director bad u Bah Robert Lyngdoh, Secretary bad kiwei kiwei.
