Shillong, Jymmang 29
Ka India Meteorological Department (IMD) ka la pynmih ïa ka jingmaham ban ther u ‘lapbah bad syllad ka lyer ha kylleng ki district ka Jylla Megha-laya, ka ban neh haduh ka 2 tarik u Jylliew.
Kumta la kyntu ïa ki nongshong shnong ha baroh 12 tylli ki district ka jylla ba kin phikir bad shim ïa ki lad jingïada namar ka thaiñ kan mad ïa ka jingsyllad ka lyer kaba jur, ka jingpom pyrthat bad ka jingther u ‘lapbah.
Katkum ka khubor ba san sngi ba la pyllait ha ka shiteng sngi jong ka Sngi Palei, la khmih lynti ïa ka lyer kaba ïaid lynti hapdeng 40-50 kmph bad kiew haduh 60kmph ha kylleng ki district kynthup ha East Khasi Hills, West Jaiñtia Hills, South West Khasi Hills bad East Garo Hills. Kine ki district la batai lypa ba kin ïoh ruh ïa u slap uba jur ha ki katto katne ki jaka ha kine ar sngi ban wan.
Hapoh ka 31 tarik Jymmang, ka suiñ bneng ka lah ban kylla sha ka jingjur ka jingpom pyrthat ha ryngkat ka ‘leilieh bad ka lyer kaba ïaid lynti hapdeng 30-40 kmph, ka ban ktah ïa ka Rilum Khasi bad Garo kumjuh ïa ka Ri-Bhoi bad ka Rilum Jaiñtia.
Katba na ka liang ka Meghalaya State Disaster Management Authority (MSDMA) pat halor ka jingmaham jong ka IMD, ka la kyntu ïa baroh ki nongshong shnong ka jylla ban shim ïa ki lad jingïada bad ban long kiba husiar.
Ka jinglong ka suiñ bneng kaba mynta ka lah ban wanrah ïa ki jingma kum ka jingshlei um, ka jingtwa khyndew, ka jingbthei jong u lyoh, ka jingtuid um, ki dieng kiba hap, bad ki jingpynthut ïa ki jingshakri jong ki kor ki bor.
La kyntu ïa ki nongleit nongwan man ka sngi bad ki nongleit jingleit kiba jngai ba kin plan bha ïa ka jingleit jingwan jong ki bad kiar na ka jingleit jingwan ha ki por ba jur slap. Dei ruh ban kiar na ki jinglehkai shabar ha kum kine ki por.
Ki nongshong shnong kiba sah ha ki jaka ba rit, hajan ki lum, lane ha ki jaka ba dang shna dei ban long kiba husiar na ka bynta kino kino ki dak jong ka jingshlei um, ne ka jingtwa khyndew.
La kyntu jur ïa ki paidbah ba kin bud ïa ki khubor ba thymmai jong ka suiñ bneng bad bud ryntih ïa ki jingbthah ba la pynmih da ki bor synshar District ban pynthikna ïa ka jingshngaiñ ha ka por ba don ka jinglong ka suiñ bneng kaba sniew.
