Mawkyrwat, Jymmang 29
Hadien ka jinghap jong u Bah Saiñkupar Lyngkhoi ha Wah Umngi naduh ka janmiet jong ka Sngi U Blei ka 25 tarik u Jymmang 2025 ha ka por ba u dang leit tong doh bad ki para shnong, ha ka 28 tarik ki paidbah ka shnong Lawblei kiba leit wad ki la ïoh ban ring dur ïa kawei ka met ïap kaba la per ha um bad sahkut ha ki bynta jong ki maw bad la suba ba ka dei ka met ïap jong utei u rangbah hynrei ki la ïathuh ba kim shym la lah ban sei namar ka jingheh bad jingkhlaiñ jong ka um artad ka dei ka jaka ba long riat.
Ki tyllong khubor ba la ïohlum ki la ïathuh ruh ba namar ka jingjur jong u slap ha kajuh ka miet jong ka 28 tarik, ka um ka la rong biang ïa katei ka met sha kawei ka kshaid kaba ki khot ka kshaid Sympyllieng kaba dei kawei na ki kshaid kaba jrong bad la ïathuh ruh ba katei ka met ka la sahkut ha tbiañ jong katei ka wah.
Kat haduh ba la pyllait ïa kane ka khubor la ïathuh ba ki pulit bad ki paidbah kim pat shym la lah ban sei ïa ka met namar ka dei ka jaka kaba eh bad sohsat haduh katta-katta ban ngam.
Kum ban shu pynkynmaw, u Bah Saiñkupar Lyngkhoi ha ka janmiet jong ka Sngi U Blei ka 25 tarik ryngkat bad lai ngut ki para shnong ki la leit tong doh na Wah Umngi hynrei ha ka por kumba 7 baje eiei u la hap bad shah rong noh ha ka um.
