Mairang, Jymmang 29
Ka District Magistrate jong ka Eastern West Khasi Hills District, Mairang ka la pynjari da ka kyndon aiñ 163 Bharatiya Nagarik Suraksha Sanhita (BNSS), 2023 ban khang pyrshah ïa ki trok kiba kit palat ïa ka 6 ton ban ïaid lyngba ka jingkieng SPT No. 14/1 kaba don ha Umjarain ha ka surok Nongshillong-Jakrem.
Ha ka kyrwoh khubor, na ka liang ka District Magistrate ka la pynpaw ba la pynjari ïa kane ka kyndon hadien ka jingïoh jingtip ba ki don bun tylli ki trok kiba kit palat pud kiba ïaid ha ka shi sngi na ka jingkieng SPT No. 14/1 kaba don ha Umjarain ha ka surok Nongshillong-Jakrem.
Shuh shuh la ong ruh ba ka jinglong jingman jong katei ka jingkieng ka long kaba la tor bad ka bym long ban ïaid ki kali kiba kit jingkit kiba khia bad kaba lah ban buh jingma ïa ki nongïaid nongïeng bad ki nongpyndonkam ïa katei ka jingkieng.
Ka District Magistrate ka la ong ruh ba lada lap ïa kino kino kiba leh pyrshah bad pynkheiñ ïa kane ka aiñ kin ngat ha ka jingshah pynshitom katkum ka aiñ 223 jong ka BNS, 2023.
