New Delhi, Jymmang:
U hehspah ha ka liang ka suiñbneng bad ka teknoloji, u Elon Musk, ha kane ka por u la pynbna ba ka por jong u kum u heh jong ka tnat pynïaid kam jong ka sorkar u Trump, ka la kut noh, da kaba ai khublei ïa u President ka US, na ka bynta ka jingailad ia u ban iadon bynta ha ka tnat ban tehlakam bad “thaw lad ban pynduna ïa ka jingpynlut ksan kai ia ka ioh- ka kot jong ka ri”.
U Musk u la ong ba ka DOGE mission kan nang khlaiñ katba nang mih ki sngi ban long ka rukom treikam bad ka nuksa kaba bha ha ka sorkar.
Ka jingmih noh jong u ka long hadien shisngi ba u Musk u la kynthoh nyngkong ia U Trump, ha kaba u la ong ba ka jingsoi jong u President, kaba “heh, kaba itynnad” jong ka aiñ pynlut pisa, ka pynkiew ia ka jingduna ha ka mang tyngka bad ka pynthut ia ka kam jong ka kynhun DOGE.
U Musk u dei u nongnoh synñiang ba ratbah tam sha ka jingïalap ilekshon jong u Trump ha u snem 2024, uba la paw ha ki jingleit jingwan jong u, hashwa ka jingthep vote bad hadien kata u la neh skhem ha ka liang jong u katba utei u nongialam ka seng Republican u dang ïakhun ban ioh shong biang ha ka shuki President kaba u la duh noh ha ki snem ba la leit. Na ka liang jong u Trump, u la iaroh ia u Musk ha ka jingkren jong u ha ka jingjop ilekshon ha u snem ba la dep, da kaba ong ba la kha ia u khlur jong ka ri naka bynta ka bha ka miat jong ka ri bad ka jaitbynriew.
Katba ka tnat DOGE pat ka dang sdang ban pyniaid ia ki kam jongka, ha ka jingkiew stet ka ioh- ka kot bad ka jinglong- jingman jongka, u Musk u la leit wad ïa ki briew kiba stad bad shemphang bha kiba kloi ban trei palat 80 kynta ha ka shi taiew ha ki kam kiba pynduna ïa ka jinglut jingsep ki bym don jingma. Da ki phew hajar ngut ki briew ki la shah weng na ki jingsiew jong ka sorkar bad katto katne ki tnat ki la shah pynduna ne shah khangdam noh, wat hapdeng ka jingpyrshang jong utei u heh ka kompeni Tesla ban ïakhun bad kiwei pat ki heh jong u Trump.
U nongbishar jong ka US District u la rai ruh ba u Musk un hap ban ïakynduh ïa ka jingshah mudui halor ka jingpyndonkam ïa ka bor be-aiñ kum u khlieh jong ka kynhun DOGE, napdeng ki mukotduma kiba bun kiba ma u bad ka DOGE ki la ïakynduh ban wad ban khanglad ïa ki ban rung sha ki system jong ki agency bad ki rekod kiba don ïa ki jingtip ba bun bha jong ki nong America shaphang ka pisa tyngka bad ki jingtip shimet jong ki.
