Shillong, Jymmang 29
U Lat ka jylla u CH Vijayashankar u la mynjur ïa ka kyrteng jong u Bah Mathew Kenneth Makdoh uba dei u nongkitkam ka Voice of the People Party (VPP) ba un long kum u MDC shu sieh (nominated MDC) sha ka Khasi Hills Autonomous District Council (KHADC).
Kane ka jingmynjur u Lat ka jylla ïa ka kyrteng u Bah Makdoh ka dei kaba la pynmih ha ka jingpynbna da u Bah CVD Diengdoh, IAS, Commissioner & Secretary jong ka Sorkar Jylla uba dei peit ïa ka tnat District Council Affairs.
Ïa kane ka jingpynbna, la pynmih ha ka 29 tarik Jymmang 2025 ha kaba u Lat ka jylla u la mynjur ïa ka kyrteng u Bah Mathew Kenneth Makdoh lyngba ka jingai jingmut jong ka Khasi Hills Autonomous District Council bad ka jinglong MDC jong u kan sa treikam hadien ba la dep shim smai.
Kum ban shu pynkynmaw, ka Executive Committee kaba la ïalam marwei da ka Voice of the People Party ha KHADC ki la leit ïakynduh ïa u Lat ka jylla ha ka 2 tarik Jymmang 2025 hapoh ka jingïalam u CEM Bah Shemborlang Rynjah ryngkat ki MDC ban ai da ka jingthoh ban mynjur ïa ka kyrteng jong u Bah Mathew Kenneth Makdoh ban long kum u MDC shu sieh bad mynta ka sngi ka 29 tarik Jymmang ka Sorkar Jylla lyngba ka tnat District Council Affair ka la pynmih da ka jingpynbna ba la mynjur ïa ka kyrteng u Bah Makdoh.
Kum ban shu pynkynmaw u Bah Makdoh u dei u kyrtong MDC ka VPP na Nongpoh Konstitwensi uba la shah rem noh ha ka ilekshon namar ki paidbah ki la jied ïa ka Kong Rona Khymdeit na ka NPP.
Ïa ka kyrteng jong u Bah Makdoh, ka Executive Committee ka la leit ban tyrwa sha u Lat ka jylla hadien ka jingmynjur na ka VPP Sengkmie.
