Shillong, Jymmang 29
Hadien ka jingsaphriang ka dur ba pura, ki pulit ka East Khasi Hills ki la ïoh ban kem ïa u runar uba la donkti ban khyllied ïa ka skad jong kawei ka khynnah skul kaba la jia ha ka taïew ba la dep ha ka thaiñ Umsohsun, Shillong.
Ha ka kyrwoh khubor ba la pyllait da u Superintendent of Police ka East Khasi Hills la ong ba ïa une u briew uba la tip kyrteng kum u Himan Gogoi, 24 snem uba dei na Jorhat ha Assam, la ïoh ban kem noh. La ong ba u dei ruh uba trei ha kawei ka restaurant hapoh ka thaiñ Oakland Road, Shillong.
Ka kyrwoh na u SP ka la ong ruh ba ha shuwa jong kane ka jingjia ha Umsohsun, une u runar u la donkti ruh ha kaba jrongkti bad leh kynshleiñ ïa kawei ka khynnah skul ha ka thaiñ Dreamland, Police Bazaar, kaba la jia ha ka 19 tarik Jymmang.
Katkum ka jingïathuh u SP la ong ba ha ka 24 tarik Jymmang, ki pulit ki la ïoh jingtip na kylleng shaphang ka durkhih kaba saphriang ha ki rynsan ‘social media’ ba pyni ïa u briew uba khyllied ïa ka skad jong kawei ka khynnah skul bad shondur ruh da ka mobile phone bad mar-mar halor kane, ki pulit ki la thaw ïa ka kynhun ba kyrpang hapoh ka jingïalam u MPS Ivan B Diengdoh ban tohkit bad thwet ïa une u runar.
U SP u la ïathuh ba ha ka jingtohkit, la ïoh lum jingtip ba kane ka jingjia khyllied skad ka la jia ha ka 23 tarik Jymmang ha ka por kumba 6:35 baje mynstep bad ki pulit ki la ïoh pdiang ïa ka ejahar ha thanat Lumdiengjri kiba la register ïa ka case hapoh ka kyndon 76/99 BNSS pule lang bad ka kyndon 11/12 jong ka POCSO Act.
Shuh shuh u la ïathuh ba tang hapoh lai sngi, ka kynhun kyrpang ki pulit ka la lah ban ithuh ïa une u runar ba kyrteng u Himan Gagoi uba la phet krad sha Jorhat ha Assam.
Ka kynhun ki pulit hapoh ka jingïalam jong ka WPSI Lavinia Khongwang ka la hiar sha Jorhat ha ka 28 tarik Jymmang bad ha ka step kaba bud, ki la pynlong ïa ka jingkhynra ha ryngkat ki pulit ka Lahdoigarh Police Outpost ka Jorhat bad ki la ïoh ban kem ïa une u runar uba la riehtngen ha ka ïing jong ki bahaïing kaba don ha ka shnong Bamkukurachua, kaba hap hapoh ka thanat Teok, Jorhat.
U Bah Vivek u la ïathuh ba kane ka kynhun ka la ïoh ban kurup noh ruh ïa ka mobile phone ba la pyndonkam da une u runar lem bad kiwei kiwei ki sakhi. La shem ruh ba u la donkti ruh ha kawei ka kam bymman kaba la register case ha thanat Teok hapoh ka kyndon 329(3)/79 BNS Act.
Ïa une u runar yn sa ïalam tiañ bishar ha District Court Jorhat bad hadien ba ïoh jingbit ban wan ïalam sha Meghalaya, yn sa ïalam tiañ bishar ïa u ha ïingbishar ha Shillong.
