Shillong, Jymmang 29
Da kaba bud ïa ki jingbthah jong ka ïingbishar High Court ka Meghalaya sha baroh ki distrik ba kin shim ki lad pynshitom kiba tyngeh pyrshah ïa ka jingdie bad pyndonkam ïa ki plastik kiba pyndonkam tang shisien bad ki pla plastik kiba ka jingrben ka duna ban ïa kaba la buh kyndon.
Ka District Magistrate jong ka East Khasi Hills, Kong RM Kurbah ka la buh ka jingmana ïa ka jingpynmih, jingkhaïi, jingdie bad jingpyndonkam ïa ki pla plastik kiba duna ïa ka 120 micron ka jingrben hapoh ka district.
Kane ka jingmana kan treikam naduh ka 1 tarik Jylliew haba pyntip ruh ba kane ka dei katkum ka hukum jong ka ïingbishar Meghalaya High Court.
Ki tiar plastik kiba la kdew harum kiba la mana ban pyndonkam naduh ka 1 tarik Jylliew, 2025, kata ki long ki tiar plastik ba pyndait ha ki jingkhlong shkor, ki balun, ki mit-mit, ice cream, ki lama plastik, ki Thermocol ban wah pynitynnat.
Kiwei pat ki long ki pliang, pela, ki tiar bam kum ki proh, shamoit, tari, tiar kjit jingdih, ki tray, jingking sha, ki tiar song synduk jingbam thiang, ki card khot sngewbha, ki banner plastik ne PVC kiba duna ïa ka 100 micron. Nangta, ki plastik ba pyndonkam tang shisien kiba la kam ba ki dei kiba lah ban pyut bad kiba lah ban pra tangba kiba khlem ïoh ïa ka jingpynthikna na ka Central Pollution Control Board (CPCB).
Kino-kino kiba pynkheiñ ïa katei ka hukum kin ngat ha ka jingshah pynshitom hapoh ka Section 18 jong ka Public Waste Management Rules kaba la pynthymmai ha ka 6 tarik Naitung, 2022 bad pynlong aiñ hapoh ka Environment (Protection) Act, 1986.
