Shillong, Jymmang 29
U coach ka kynhun ïalehkai ka ri u Manolo Márquez, u la pynthikna ïa ki 28 ngut rangïalehkai kiba dang don ha ka prokram kilanmet ha Kolkata, kin leit sha Thailand, na ka bynta ka jingïalehkai paralok kaba la buh ban long ha ka 4 tarik u Jylliew.
Ka India ka la sdang ban kilan met ha katei ka nongbah naduh ka 19 tarik mynta u bnai bad kane ka kynhun ka la mih ha ka sngi Balang ban leit sha Thailand. Ka jingïalehkai paralok hapdeng ka India bad ka Thailand kan long ha ka 4 tarik u Jylliew. Ha ka sngi kaba bud, ka India kan leit sha Hong Kong na ka bynta ka jingïakhun wat nyngkong jong ka AFC Asian Cup 2027 Qualifiers pyrshah ïa ka Hong Kong ka ban long ha ka 10 tarik u Jylliew.
Ha Kolkata, ki rangïalehkai jong u Márquez, ki la jop da 2-1 pyrshah ïa ka lahduh jong ka Santosh Trophy ka Bengal, ha kaba u Brandon Fernandes bad u Ashique Kuruniyan ki la ïoh ban thep kol. Ha kane ka Sngi Ba-ar pat ka la pynliem ïa ka North 24 Parganas da 3-0 kol ha kaba u Sunil Chhetri, Chinglensana Singh Konsham bad u Udanta Singh Kumam ki la ïoh ban thep kol.
