Shillong, Jymmang 29
Namar ka jingdon jong ka jingkhih bad ka jinglong jingman ka bym bha ha ri Bangladesh, ka Sorkar Pdeng ka la bthah ïa ka Sorkar Meghalaya ba kan pynkloi noh ïa ka kam kaba ïadei bad ka jingker ha shi lynter jong ka thaiñ khappud bad kane ka ri.
Ha kaba ïadei bad kane, u Chief Secretary ka Jylla u Bah DP Wahlang u la ong, “U Myntri Rangbah ka jylla u Conrad K Sangma dang shen u la ïakynduh ïa u Myntri ka tnat Kam Pohïing ka ri u Amit Shah bad u la ïakren halor katei ka mat kaba ïadei bad ka jingker sainar ha khappud. Ka tnat Kam Pohïing ka la ong ïa ngi, ba ngi donkam ban pynsted noh ïa ka kam bad ban pynthikna ba baroh ka dei ban ïaid ha ka lynti jong ka thong bad ban pynkut noh ïa baroh ki kam kiba ïadei bad ka jingshim jaka, khnang ba ka jingker sainar kan ïaid noh mardor.”
U Chief Secretary u la pynthikna ba 75-80 persen jong ka jingker sainar yn pyndep hapoh jong une u snem. “Ngi don ïa u pud u sam ha ka thaiñ khappud kaba long 443 Km ha kaba ka jingker sainar kumba 60 persen ka dei kaba la pyndep bad kaba sah ka dei sa 40 persen eiei kaba hap ban pyndep hynrei da ka jingshim ïa ki sienjam kiba dang shen. Ngi la don ïa ka jingïalang haduh 6-7 sien ban khmih halor kane ka kam ha kaba kiba bun hi ki dei kiba la lum da u Myntri Rangbah ka jylla. Ngi pynthikna ba ha shwa ban kut une u snem kane ka jingpyndep kaba la kynjoh sha ka 60 persen ka dei ban kiew noh sha ka 80 persen eiei.”
Ha kajuh ka por u la pyntip ba ki la don katto katne ki mat kiba ïadei bad ka jylla. Kaba nyngkong ka dei ba katto katne ki mukotduma ki dang don hapoh ka jingbishar ka ïingbishar, ïa kaba donkam ban pynbeit noh bad ka ba-ar ka dei ba ki don katto katne ki bynta ïa kaba ka jingpynshisha bad ka jingpynskhem ka donkam ban phah noh da ki Deputy Commissioner sha ka tnat Kam Pohïing ka Ri khnang ba kan ïoh pyllait noh ïa ka bhah tyngka.
“Ha kaba ïadei bad ka bynta ka ba-ar, la dep ai ïa ki syrnod jingpynshisha da ki DC jong ka jylla bad ka Sorkar India ka dang khmih bniah ïa ki kot ki sla bad shen yn sa pyllait noh ïa ka pisa. Nga ngeit skhem ba shisien ba la dep pyllait ïa ka pisa, yn sa sdang noh ïa ka kam,” ong u Bah Wahlang bad bynrap “Ha kaba ïadei bad ki mukotduma ha ïingbishar, ngi la dep kyrpad ïa ka ïingbishar ban ailad ban sdang noh ïa ka jingtei ban ker sainar, katba ym pat dep ban shim ïa ka rai kaba khatduh namar ba ka dei na ka bynta ka jingshngaiñ kaba don bynta bha mynta”.
