Pynthut u slap & u lyoh ba rben ïa ki pulit ha ka jingwad ïa ki shikurim ha Sohra

Shillong, Jymmang 29

Ka jinghap u slap uba jur bad u lyoh uba rben ha ki thaiñ Sohra ka la pynthut ïa ki pulit ba kin leit wad ïa ki shikurim kiba na Indore, Madhya Pradesh kiba la jah rngai naduh ka 23 tarik mynta u bnai hadien ba ki la wanphai na Nongriat.

Ka jinghap u slap ba khlem sangeh bad ka jingrben u lyoh ka la sdang ha ka por 4:00 baje janmiet jong ka 28 tarik Jymmang bad bteng ruh ha ka sngi Palei ka 29 tarik Jymmang.

Namar ka jinghap u slap bad wan tap sa u lyoh uba rben ka la pynthut ïa ki pulit namar kim lah ban pynher ïa u drone sha suiñ bad kim lah ban ïohi naba kah u lyoh.

Haduh mynta ka sngi ka 29 tarik Jymmang, ki pulit ka East Khasi Hills District kiba don ha Sohra bad Shillong ki dang bteng ban leit wad kylleng ki jaka ha ki thaiñ Sohra kum ha Sohrarim, Nongriat, Domlakhiat bad don kiba leit wad na ki thaiñ Tyrna ban poi sha Nongriat.

Kum ban shu pynkynmaw, ki pulit ka Sohra Civil Sub Division ryngkat ki pulit ka tnat SDRF bad ki nongkitkam shnong Sohrarim ki la leit rung sha ka khlaw bad ki riat kiba don ha Sohrarim ban leit wad ïa ki shikurim.

Kine ki shikurim kiba la jah rngai ki long ka Sonam Raghuvanshi bad u Raja Raghuvanshi kiba la poi sha Domlakhiat ha ka 22 tarik mynta u bnai da kawei ka arshaka kaba la shim wai na Shillong ban leit sah miet sha Nongriat bad ha ka 23 tarik Jymmang, ki la wanphai na Nongriat bad naduh kane ka sngi ym shym la ïohi shuh ïa ki namar ka arshaka kaba ki pynïeng ha Domlakhiat kam don shuh hynrei la lap hajan Golden Pines Dhaba kaba don ha Sohrarim.

Kane ka jingleit wad ki pulit sha khlaw bad riat ha Sohrarim ka dei namar ki la lap ïa ka arshaka hajan ka Golden Pine Dhaba.

Namar bym lap ksai eiei, ki pulit ha ka 28 tarik mynta u bnai ki la hiar biang sha Nongriat ban ïaid lyngba ka shnong Domlakhiat kaba dei ka lynti ba ki wanphai na Nongriat.

Kat haduh mynta ki bahaïing jong kine shikurim ki dang don ha Sohra ban leit wad lang bad ki pulit.

Namar ka jingbym pat lap ksai ïa ka lynti ba ki jah, ka la pynsah umdum ïa ki bahaïing bahasem bad ïa ki pulit jong ka jylla Meghalaya.