Shillong, Jymmang 29
Ka East Bengal FC ha ka sngi Palei ka la pynbna ba ka la pynjlan ïa ka kontrak sa shi snem ïa u coach uba na Spain u Oscar Bruzon ka ban kut haduh ka aïom ïalehkai 2025-26.
U Bruzon u la shimti ïa ka jingkitkhlieh na ka bynta katei ka kynhun kaba na Kolkata ha ka samoi ïalehkai ba la lah hadien ba ka la beh noh ïa u Carles Cuadrat. Kumta utei u coach uba na Spain u la ïalam ïa ka East Bengal sha ka jingïoh poiñ kaba heh tam (28) ha ka lympung ïalehkai Indian Super League watla kane ka klob kam shym la lah ban ïalehkai bha ha kaba sdang jong ka samoi ïalehkai.
Hapoh ka jingpynïaid jong u Bruzon, ka East Bengal ka la wan ha ka kyrdan ba hakhlieh ha ka Group-A bad ka la jam sha ka quarter-final jong ka AFC Challenge League ba nyngkong ha ka samoi ba la lah.
“Nga sngewkmen ban pynjlan ïa ka jingïaid lynti jong nga bad ka Emami East Bengal FC na ka bynta ka samoi ban wan. Katba ka samoi ba la dep ka la wanrah ïa ki jingeh, khamtam hadien ka jingsdang kaba suki, ngi la ïoh ki jingsngewthuh ha katei ka lympung bad mynta ngi la pynleit jingmut pura na ka bynta ban kyntiew ïa kane ka klob,” la ong u Bruten hadien ba la pynjlan ïa ka kontrak ka jong u.
“Ki nongkyrshan ba ïaineh jong ngi kim don hok ban ïoh ei ei, hynrei ba ngin trei shitom na ka bynta ban pynurlong ïa ka jingjop,” la bynrap biang u Bruzon.
