Nongpoh, Jymmang 29
Ki pulit ka Ri Bhoi ki la ïoh ban kem noh ïa uwei napdeng ar ngut ki runar ba la suba donkti ban batbor bad leh be-ijot ïa kawei ka samla kaba don jingduna ha ki dkhot met. Kane ka jingjia ka dei kaba la jia ha ka janmiet jong ka 25 tarik mynta u bnai ha kawei ka shnong kaba dang hap hapoh ka thanat Umsning.
Katkum ka tyllong khubor na ki bahaïing katei ka lanot, la ïathuh ba katei ka samla ka la shah batbor bad shah leh be-ijot ha kawei ka khlaw kaba don harud jong ka surok shnong. La ïathuh ba hadien katei ka jingjia, katei ka lanot ka la phet ruma sha ïing ki bahaïing bad dei hangta ba ki bahaïing ki la tip ïa kaei kaba jia bad mar-mar la pyntip noh sha ka kmie bad u kpa jong kane ka lanot.
La ïathuh ruh ba na ka liang jong ka kmie bad u kpa katei ka lanot tang mar ïa ïoh jingtip halor katei ka jingjia, mar-mar hi ki la leit shaw noh ïa la ka jong ka khun bad ha ryngkat ka jingdonlang ki bahaïing, ki la leit ruh ban jurip ïa ka jaka kaba katei ka samla ka la shah leh be-ijot.
Shuh shuh, na ka liang ki bahaïing ki la ïathuh ruh ba na katei ka jaka, la lap ruh ïa kawei ka mobile phone kaba la suba jur ka dei jong uwei na ki runar ba la donkti, nalor ka patlun jrong bad ka patlun poh jong katei ka lanot kaba ki bahaïing ki la leit ban shim ha ka step kaba bud hadien ka jingbthah jong ki bor pulit.
Halor kane ka bynta, na ka liang ki bahaïing katei ka lanot ki la kyrpad ïa ki bor jong ka aiñ ba kin shimkhia bad pynshitom ïa ki runar kiba donkti da kaba tyngeh khnang ba kum kine ki jingjia kin ym jia shuh hadien habud.
