Shillong, Jymmang 29
U Myntri Rangbah ka Jylla, Conrad K Sangma u la shimkhia hi da lade bad ban bishar bniah ïa ka kam ha kaba ïadei bad ka jingjah rngai jong ki shikurim na Indore, kiba la hiar sha ka thaiñ Sohra.
U Conrad u la ong ba halor kane ka jingjah rngai, na ka liang jong u Myntri Rangbah ka Madhya Pradesh u la ïakren bad u, bad ruh la kyrpad na ka ophis ka tnat Kam Pohïing ka Sorkar Kmie ban shimkhia lem halor kane ka kam.
Lah ban pynkynmaw ba ar ngut shikurim na katei ka jylla kiba wan kai ha Sohra kiba la tip kyrteng kum ka Sonam Raghuvanshi bad u Raja Raghuvanshi, ki la jah rngai naduh ka 23 tarik mynta u bnai ha ki bynta ka thaiñ Sohra.
U Myntri Rangbah ka jylla u la ong ba na ka liang jong u, u la ïai peitngor ïa kane ka jingjia man ka sngi, ha kaba na ka liang u SP, ki bor pulit, ki nongshong shnong katei ka thaiñ ki la pynlong ïa ka jingwad ïa kine ki shikurim sngi bad miet bad da ka jingwad lyngba ki tiar technology.
U la ong ruh ba namar ba ka dei ka aïom slap bad ba la ju tip ruh ïa ka Sohra kum ka jaka ba jur slap, kumta ka long kaba eh haduh katta-katta hynrei na ka liang ki pulit ki la pyrshang katba lah ban lap noh ïa kitei ar ngut.
U la ïathuh ruh ba kine ar ngut ki la pynïeng ïa ka arshaka kaba ki la shim wai na kawei ka jaka kaba don harud surok, kumta u la ong ba lehse ki la buh ïa ka arshaka ha katei ka jaka ban leit ïaid kjat pat, namar ba ha katei ka jaka ba ki pynïeng ïa ka arshaka ki don ar tylli ki jaka leit ïaid kjat bad ki dei ki jaka ba long riat, khamtam eh ha kane ka aïom slap ka lah ban btuit ruh.
Kumta u la ong ba ka jaka ba ki leit wad ka long kaba ïar bha hynrei na ka liang ki pulit bad ki bor shnong kin ïai trei shitom ban wad ïa ki bad kyrmen ban lap noh ïa ki.
Shuh shuh na ka liang jong u Conrad u la ong, “Ha ngi ki nongjngohkai pyrthei ki dei kum ki bahaïing, khamtam eh ha Sohra ki ju kheiñ ïa ki nongjngohkai kum ki bahaïing jong ki,” la ong u Conrad.
