Shillong, Jymmang 29
U Avinash Sable uba la bat ïa ka rekod hapoh ka ri, ha ka sngi Palei u la kylla long uba nyngkong na India ha ki 36 snem ban khur ïa ka takma ksiar ha ka jingmareh 3000m steeplechase jong ka Asian Athletics Championships 2025 hadien ba u la lah ban pynpaw ïa ka jingtbit ha kane ka aïom.
U Sable u la lah ban pyndep ha ki 8:20.92 sekhon ban ïoh ïa katei ka nam ba ha khlieh duh, kaba dei ruh ka takma kaba ar ha Asia hadien ba u la ïoh ïa ka takma rupa ha u snem 2019. Ka sien kaba khatduh ba ka India ka la ïoh ban khur ïa ka takma ksiar ha kane ka jingïalehkai ka dei ha u snem 1989 ha kaba ka Dina Ram ka la lah ban pyndep ïa ka kyrdan ba ha khlieh duh.
U Harbel Singh u dei pat u nong India ba nyngkong eh ban khur ïa ka takma ksiar ha liang ki shynrang ha kane ka jingïalehkai ha u snem 1975.
Nalor u Avinash uba la khur ïa ka takma ksiar, u Yutaro Niinae ka Japan u la khur ïa ka takma rupa bad pyndep ha ki 8:24.41 sekhon bad ïa ka takma rnong la khur da u Zakaria Elahlaami na Qatar uba la pyndep ha ki 8:27.12 sekhon.
Ha kane kajuh hi ka sngi, ka kynhun ki rangïa-lehkai ka ri India ba kynthup ïa u Rince Joseph, Dharmveer Choudhary, Manu Thekkinalil Saji, bad u Mohit Kumar, ki la rung sha ka final ha ka jingïakop mareh 4x400m men’s relay team hadien ba la lah ban pyndep ha ki 3:06.28 sekhon.
Ha kane ka jingïakop mareh, ka India ka la tam ïa ka China (3:06.79) bad ïa ka Korea (3:10.05) na ka bynta ban ïoh rung sha kawei pat ka wat.
Haduh ka sngi kaba lai jong kane ka lympung ka India ka la khur 14 tylli ki takma, kiba kynthup ïa 5 tylli takma ksiar, 6 tylli takma rupa bad 3 tylli takma rnong.
