Shillong, Jymmang 30
Ka India ka la bteng ban ïoh khur takma ha ka lympung ïalehkai Asian Athletics Champion-ship namar ha ka sngi kaba saw ka la ïoh lai tylli ki takma ksiar na ka bynta ban kynjoh sha 18 tylli bad ban ïai bteng ban bat ïa ka kyrdan ba-ar kata hadien ka China.
Ka long ka jingkmen kaba khraw ha kaba hynne ka sngi ka ‘thei ïalehkai kaba dang 18 snem ka rta ka Pooja ka la thaw ïa ka rekod kaba thymmai ban khur ïa ka takma ksiar ha ka high jump jong ki kynthei. Kane ka la long ka sien kaba nyngkong naduh u snem 2000 ba ki nongïalehkai na India ki la ïoh ban khur takma ksiar ha ka Asian Athletics Championships.
Katba u Gulveer Singh u la lah ban pynurlong ban ïoh sa kawei ka takma ksiar ha ka jingïakob mareh kaba 5000m bad kham ha shwa u la khur ïa ka takma ksiar ha ka jingïakob mareh 10,000m. Kumba ka paw u Gulveer uba la lah ban pynurlong ban khur takma nyngkong na ka bynta ka ri India ha ka sngi kaba nyngkong jong kane ka lympung kaba dang ïaid mynta ha Gumi kaba ha South Korea.
Ha kane ka jingïakob ka Pooja ka la ïoh ïa ka ksiar da kaba ka la lah ban kynthih 1.89m. Ha kaba sdang kam shym la lah ban kynthih ïa ka 1.83m bad 1.86m ha ka jingpyrshang kaba nyngkong, hynrei da ka jingsngewthuh ba lada kynthih ïa ka jingjngai kaba 1.86m kan ïarap ban pynurlong na ka bynta ban ïoh ïa ka ksiar, te kumta ka la lah ban kynthih palat ïa ka 1.89m ha ka sien pyrshang ba nyngkong eh jong ka.
Ka Pooja ka la pyrshang ban thaw ïa ka rekod thymmai ha ka ri, da kaba ka la lah ban kynthih ha ki 1.92m na ka bynta ka jingkiew kaba khatduh jong ka, hynrei ka la shah rem tang khyndiat. Wat la katta ruh, ka ‘thei ïalehkai ka don ïa ka thong ban khur ïa ka takma ksiar.
Ïa ka takma rupa la khur da ka nongïalehkai kaba na Uzbekistan ka Safina Sadullaeva da kab ka la lah ban kynthih ha ki 1.86m, katba u nongïalehkai na Kazakhstan ka Yelizaveta ka la khur ïa ka takam rnong.
Kumba ka paw kane ka dei ka sien kaba nyngkong eh ba ka Pooja kan khur takma ha kane ka lympung kaba heh. Ka la khur ïa ka takma ksiar ha ka Asian U-18 Championships kaba ha long ha Tashkent.
Ka Pooja ka la wan na ka longïing ha kaba u kpa jong ka, u Hansraj uba trei kum u nongbylla shna ïing. Wat hapdeng ka jinghiran ha ka ïoh ka kot, ka Pooja ka la sdang da ka jingïalehkai gymnastics hashwa ba kan kynriah noh sha ka jingïalehkai high jump hapoh ka jingïalam u coach u Balwan Singh.
Na ka liang u Tejaswin Shankar, uba la khur ïa ka takma rupa ha ka Decathlon, u la ong ba ka jingïoh khur takma ksiar ka Pooja ka long ka jingjop kaba khraw ïa ka ri ha ka Asian Athletics Championships.
“Ha nga hi ka jingjop kaba khraw ha ka AAC2025 kaba la long ha Gumi ka dei ka Pooja,” u la bynrap.
Haba phai sha u Gulveer u la ban pynkheiñ ïa ka rekod kaba shiphew snem ha ka jingmareh 5000m jong ki shynrang. Une u nongmareh uba bat ïa ka rekod jong ka ri da kaba u la pyndep ha ki 13:24.77 sekhon ban tam ïa u Kieran Tuntivate na Thailand (13:24.97 sekhon) bad u Nagiya Mori na Japan (13:25.06 sekhon) kiba la khur ïa ki takma rupa bad rnong.
Da kane ka jinglah ban ïalehkai bha, u Gulveer u la long uba ar na ki nongïalehkai ka ri ha ka Asian Athletics Championships ban khur jingjop ha ka 5,000m bad 10,000m ki shynrang hadien ïa u G Lakshmanan uba la jop ha u snem 2017.
