Williamnagar, Jymmang 30
U Myntri Rangbah ka Jylla, Conrad K. Sangma ha ka Sngi Ba-ar u la aiti ïa ki ‘Smartphone’ sha ki nongtrei ‘Anganwadi’ ha ka prokram kaba la long ha St. George Higher Secondary School ha Samanda, East Garo Hills.
Ha kane ka sngi la wan ban ïashim bynta da ki nongtrei ‘Anganwadi’ na ki bynta bapher-bapher ka East Garo Hills, kiba la ïohpdiang ïa ki ‘Smartphone’.
Ha kane ka sngi la donlang ruh u Myntri ka tnad Social Welfare, Bah Paul Lyngdoh bad Myntri ka tnad PHE, u Marcuise Marak.
U Myntri Rangbah haba kren ha kane ka sngi u la ong ba ki ‘Smartphone’ kin pynbha ïa ka jingtreikam bad ka jingshakri jong ki nongtrei ‘Anganwadi’.
Ka tnad Women & Child Development ka Sorkar Pdeng ka la bei tyngka T.6 klur ban thied ïa 6,162 tylli ki ‘Smartphone’ na bynta kine ki nongtrei, ka ban kyrshan ïa ki ha ki bynta ba kongsan jong ki.
“Ki ‘phone’ kin weng ïa ka jingeh ha ka liang ka lad ‘digital’ bad pynbha ïa ka jingshakri,” u la ong.
U Myntri Rangbah u la pyntip ba la buh ruh ïa ka ‘POSHAN App’ ha ki ‘Smartphone’, ha kaba ki nongtrei ‘Anganwadi’ kin pyndonkam ban lum thup ïa ki jingkheiñ bad ki jingtip kumjuh ban leh ïa kiwei pat ki kam thoh, ban pyntikna ïa ka jingbuddien kaba kham bha bad ka jingpyntreikam ïa ki skhim ba ïadei bad ka bha ka miat ha ka imlang-sahlang.
Ka ‘Mobile Application’ ka pynkylla ‘digital’ ïa ka rukom pynrung kyrteng ba la pyndonkam da ki nongtrei ‘Anganwadi’, ka ban pynbha ïa ka jingtreikam jong ki, ha kajuh ka por ban ïarap ha ka liang ka jingpeit bniah ha ka por ba shisha.
U la pyntip ruh ba yn ai jingkyrshan ïa ki nongtrei ‘Anganwadi’ na bynta ka jingbuddien ba man ka por ïa ka jingheh jingsan jong ki khynnah haduh 6 snem ka rta da kaba thew ïa ka jingjrong bad jingkhia jong ki kumjuh ban buh pat ïa ki jingtip ha ka ‘POSHAN Tracker’.
