Nongstoiñ, Jymmang 30
U Deputy Commissioner-cum-Chairman, West Khasi Hills District u la pynmih ïa ka hukum bad bthah ïa ki District Incident Response Teams (DIRT), ki BDO bad kiwei pat tnad sorkar kiba don bynta lang, ba ki dei ban don ha ka jaka kaba ki trei ban peit pyrman ïa ka jinglong-jingman bad ban pyntip kloi sha ka District Emergency Operation Centre, West Khasi Hills District, Nongstoiñ lada don kino-kino ki jingjia khnang ban ïoh shimkhia halor ki jingjia kiba lah ban mih na ki bor lynshop ka mariang.
Ka kyrwoh khubor na u DC ka ong ruh ba katei ka jingbthah bad pynmih hukum ka long ruh ha kaba ïadei bad ki jingpyntip lyngba ka IMD, All India Weather Warning Bulletin kaba la pynmih ha ka 30 tarik u Jymmang 2025, ba ka lah ban don ka jingslap kaba jur ha ki katto-katne ki bynta jong ka jylla Meghalaya bad Assam naduh ka 29 tarik u Jymmang 2025.
U Deputy Commissioner u la kyntu ruh ïa ki BDO ba kin long kiba la khreh bad ban shimkhia kloi lada don kino-kino ki jingjia na ki daw ka bor mariang ha ki Block jong ki bad ban pyntip kloi sha u Deputy Commissioner-cum-Chairman, DDMA, West Khasi Hills District.
Ha kawei pat ka khubor u Deputy Commissioner West Khasi Hills bad Chairman District Disaster Management Authority (DDMA), West Khasi Hills District, Nongstoiñ u la pyntip bad ai jingmaham ïa ki paidbah ba kumno kin ïarap dalade ïalade ha ka por ba jur slap, lyer bad u pyrthat.
Shuh shuh, u la ong ruh ba ki paidbah kidei ban khmih bha bad pynskhem bha ïa ki tiar ki tar kiba lah ban shah rong ha ka lyer kum ki thup dieng, ki tin sop lane mawit ba shong synjor, ki tin theh ñiut, ki signboard bad kiwei kiwei ki mar kiba lah ban shah rong ha ka por ba jur ka lyer.
Nangta, u la ong ruh ba lada ka jingthaba ka ‘leilieh ka long kaba jur bad neh slem kan bha shibun ban ym pyndonkam ne ban pynmeh ïa ki tiar ilektrik kum ki mobile, isteri, radio, television bad kiwei kiwei ki tiar kiba pyndonkam da ka bor ilektrik.
Nalor kane u la kyntu ruh ba ki nongshong shnong ki dei ban long kiba phikir bha bad ïada ïalade namar ka jingshlei um ka lah ban jia hadien jong u ‘lapbah khamtam ha ki jaka kiba don harud jong ki wah bad ki wahduid.
U la kyntu ruh ïa ki paidbah ban kiar na kaba ïaid kai ne jam ïa ki wahduid, wahbah bad ki kshaid ha ka por ba jur slap namar ngim tip thikna ïa ka bor jong ka bad ka um kaba jyndong bad tuid sted ka lah ban wanrah ïa ka jingshah rong ha ka um.
Shuh shuh u la kyntu ruh ba wat tur ne ñiah ïa ki kali haba don ka jingshlei um ha lynti bad kiar ruh na ki post electric ban lait na kano-kano ka jingmynsaw.
U DC u la pyntip ruh ba la buh ïa ki telephone number ha kaba ki paidbah ki lah ban phone lada jia kino kino ki jingjia lyngshop ka bor mariang bad kine ki long District Emergency Operation Centre, District Disaster Management Officer, Nongstoin :- 03654 -295503 / 9862011303 (DDMO). ADC, Revenue & Disaster Management Department: – 09362541814, BDO, Nongstoiñ C&RD Block – 07005252778, BDO, Mawshynrut C&RD Block – 07005683966. Ki paidbah ki lah ruh ban phone ha u Toll free No.1077 lane download ïa ka Sachet App na ka Google play: https://sachet.ndma.gov.in/download Mobile App ban ïoh ïa ki SMS kiba ïadei bad ka mariang ki ban pyntip lypa shuwa ka jingther slap ne erïong.
