Shillong, Jymmang 30
Ka Paris St-Germain bad ka Inter Milan kin ïakynduh pyrshah ha Munich ha ka step jong ka Sngi U Blei na ka bynta ban ïaknieh ïa ka nam lahduh ha ka Champions League.
Hadien 188 tylli ki jingïa-lehkai, ki 36 tylli ki kynhun na kylleng na Europe ki la ïakhun tyngeh bad ban pynpaw ïa la ki jingtbit hynrei mynta sa tang 2 tylli ki kynhun ki ban shim ïa ka rai ban rah ïa katei ka nam.
Uwei na ki ‘riew shemphang jong ka France u Julien Laurens u la pynpaw, “Ka long kaba eh ban rai, khamtam u long uwei napdeng ki nongkyrshan jong ka PSG. Ka Inter ka don ka jingshemphang kaba lah ban wanrah ki jingkylla ha kane ka lympung ïalehkai kiba heh. Ka mynsiem jong nga ka noh sha ka PSG hynrei ka khlieh jong nga ka long sha baroh ar ki kynhun bad ka long kaba eh ban rai.”
Kawei na ki ‘riew shemphang na Italy ka Mina Rzouki ka la pynpaw, “Ka jingkyrmen jong nga ka long sha ka PSG, namar u Luis Enrique u dei u briew uba nang bha kumno ban pynurlong ïa ka jingjop ha ki jingïalehkai.
U rangïalehkai shapdeng barim ka Germany u Thomas Hitzlsperger u la ong, “Ka long kaba eh shisha, namar nga itynnad ïa ka rukom ïalehkai ka Inter kaba la lah ban jam shaduh ka final bad ka don hok ban poi shaduh kane ka thong. Hynrei haba nga phai sha ka Paris St-Germain bad nga itynnad ïa ka rukom ïalehkai jong ki”
“Nga ïohi ïa ki kum ka kynhun kaba nga pyrkhat ba kan khur ïa ka jingjop, hynrei kiei-kiei baroh ki long kiba lah ban long namar nga la sngewtynnad bha ïa ka Inter ruh, khamtam pyrshah ïa ka Bayern Munich (ha ka jingïakhun ha ka quarter final) da kaba ki lah ban ïada ïalade bad kumno ki lah ban khur ïa ka jingjop,” u la bynrap da kaba ong ba ka PSG kan khur ïa ka jingjop namar ka dei ka aïom jong ka ha ka Champions League.
