Shillong, Jymmang 30
Ki khlur ïalehkai ba kynsai ki la ïai bteng ban jam shaphrang ha Roland Garros ha ka sngi Thoh-dieng, ha kaba ka Aryna Sabalenka kaba bat ïa ka kyrdan ba nyngkong ha ka pyrthei, u Lorenzo Musetti na Italy bad ka Zheng Qinwen na China kiba la lah ban pynthikna ban jam sha ka pre-quarter final ha ka French Open hadien ba ki la lah ban ïoh ïa ki jingjop.
Ka Aryna Sabalenka ka la bteng ïa ka jingjop da kaba ka la pynliem noh ïa ka Olga Danilovic na Serbia da 6-2, 6-3 ha Court Philippe Chatrier. Kane ka nongïalehkai ka la lah ban tam da 5-0 ha ka set ba nyngkong shwa ba kan pynurlong syndon ïa ka jingjop.
“Nga sngewkmen eh halor kane ka jingjop,” la pynpaw ka Sabalenka hadien ka jingjop.
“Ka Olga ka la lah ban ïalehkai bha bad nga la khmih lynti ba kan long ka jingïalehkai kaba itynnad. Ka la lah ban ïalehkai kum ki nongïalehkai kiba don ha ka thup kaba shiphew bad nga sngew ban ong ba kan sa lah ban ïalehkai bha ha kane ka lympung ha ki snem ki ban dang wan.”
Lyngba kane ka jingjop ka Sabalenka kan pynkhreh ïa ka jingïakhun pyrshah ïa ka Amanda Anisimova, kaba la rung semi final teng ha Paris bad kaba la lah ban pynliem ïa ka Clara Tauson da 7-6(4), 6-4 ha ka wat ba lai jong kane ka lympung.
Ha kawei ka jingïa-lehkai u Lorenzo Musetti u la jam sha ka pre-quarter final hadien ba u la jop da 4-6, 6-4, 6-3, 6-2 ïa u Mariano Navone na Argentina.
Hadien ka jingshah tam da 4-6, 0-2, utei u nongïalehkai na Italy u la don hapdeng ka jingeh. Hynrei une u rangïalehkai uba la khur takma rnong ha ka Olympic u la pyrshang ban ïakhun tyngeh pyrshah ïa u Navone bad hadien u la lah ban ïoh ïa ka jingjop.
Haba phai sha ka nongïalehkai na China ka Zheng Qinwen, ka la lah ban jam sha ka pre-quarter final hadien ba ka la lah ban jop da 6-3, 6-4 ïa ka nongïalehkai kaba dang 18 snem ka rta na Canada ka Victoria Mboko.
Kane ka long ka sien kaba ar ba ka Zheng ka la lah ban jam sha ka pre-quarter final, hadien ba ka la ïalehkai nyngkong ha u snem 2022. Te kumta kan ïakynduh pyrshah ïa ka Liudmila Samsonova lane ka Dayana Yastremska na ka bynta ban ïaknieh rung sha ka quarter final.
