Shillong, Jymmang 30
Ka Hynñiewtrep Youth Development Council (HYDC) ka la pynpaw ïa ka jingsngewsih halor ka jingjah rngai jong ar ngut shikurim kiba dei ki nongwan jngoh kai pyrthei na Indore, Madhya Pradesh kiba la leit ban jngoh kai ïa ka Sohra naduh ka 23 mynta u bnai hadien ba ki la wanphai na Nongriat.
Haba kren sha ki lad pathai khubor ha Shillong Press Club ha ka 30 tarik Jymmang, 2025, u President ka Hynñiewtrep Youth Development Council, Bah Wyraiwan Sohtun u la pynpaw ba ka seng ka dap da ka jingsngewsih kaba khraw ban ïohi ba kawei na ki lad pathai khubor kaba paw bha hapoh ka Ri India ïa kaba la tip kum ka Times of India (TOI), ka la pynmih khubor da kaba thoh shai kdar ba ka thaiñ Sohra ka dei kawei na ki jaka kaba jur bha ki kam sniew (Crime Prone Area).
U Bah Sohtun u la ong ba ka seng ka pynrem jur halor kane ka jingpynmih khubor jong ka Times of India namarba lyngba kane ka jingthoh ka la pynbudnam ïa ka thaiñ Sohra hi baroh kawei da kaba pynpaw ba kane ka dei kaei-kaei kaba sngewsih bha namarba ki briew kiba im ha Sohra ki dei ki briew kiba tipbriew tipblei bad ki dei ruh ki briew kiba sngewthuh katno ka long kaba donkam ïa ki nongjngoh kai ba kin wan sha katei ka jaka.
“Ki briew hapoh ka thaiñ Sohra ki dei kiba burom ïa ki nongwan jngoh kai namar ki sngewthuh ba ka kamai kajih jong ki, ki im ja na ki nongwan jngoh kai,” ong u Bah Sohtun.
U la pyntip ba haduh mynta kam pat don kawei ruh ka kam sniew kaba ki briew hapoh Sohra lane ka Jaitbynriew kan don ïa kata ka mynsiem ban shun ne isih ïa ki nongwan jngoh kai pyrthei kiba wan nabar.
“Ki nongwan jngoh kai pyrthei kiba wan hangne hapoh ka Jylla jong ngi, ngi kheiñ ïa ki ba ki dei kum kita ki paralok kiba wan shang kai hangne bad ngi burom bha ïa ki,” ong u Bah Sohtun.
Shuh-shuh, u Bah Sohtun u la bynrap ba ka jingmih khubor ha ka Times of India ba ka Sohra ka dei ka jaka ba mih shibun ki kam sniew, ka dei ka jingkren laplah jong katei ka kotkhubor bad ong ba kum ka Seng ka kwah ïa ka jingpynshai na katei ka kotkhubor, hato ki don ne em ïa ki jingpynshisha ban ong ba kane ka thaiñ ka dei kaba jyllei ki kam sniew?
“Ka Times of India ka dei ban da wad ïa ki jingshisha shwa ba kan thoh ïa kino-kino ki jingthoh kiba dei pyrshah ïa ka Jylla jong ngi khamtam ïa ka thaiñ Sohra kaba bun bah ki nongwan jngoh kai kiba wan shang kai sha Sohra ban peit ïa ka jingitynnad jong ka jaka bad ka mariang,” ong u Bah Sothun.
Kumta, na ka liang ka HYDC ka la dawa na ka Times of India ba ka dei ban panmap kaba khlem buh ïa kino-kino ki nongrim na ka bynta ka jingthoh jong ki halor ka jingjah jong ar ngut ki nongwan jngoh kai ha Sohra.
Da kaba kyrmen skhem ruh ba lyngba ka jingtrei shitom jong ki nongshong shnong ka thaiñ Sohra, ka Tnad Pulit bad kiwei-kiwei kiba la don bynta ha ka ban leit wad ïa kitei ki shikurim sha Sohra ba shen yn sa lap noh ïa ki hapdeng ka met ka phad kaba koit ba khiah.
