Washington, Jymmang:
U Secretary of State jong ka U.S., u Marco Rubio, ha ka Sngi Balang u la ong ba ka America kan sdang ban weng noh ia ki Visa jong ki samla pule na China kynthup ia kito kiba don jingiadei bad ka seng Communist Party jong ka China lane kiba pule ha ki bynta kiba kongsan.
Ha ka kyrwoh, u Rubio u la ong ba ka tnad kan sa pynbeit thymmai ruh ia ki kyndon ai visa ban pynkhlain ia ka jingpeit bniah ia baroh ki jingpan visa kiban wan na China bad Hong Kong.
Ka Embassy jong ka China ha Washington kam shym la jubab mardor halor ka jingkyrpad ban ai jingtip halor kane.
Ka China ka dei ka ri kaba ar ha ka jingbun ki samla pule nabar ri kiba wad ïa ki jingpule ba kham shalor ha America ha u snem 2023/2024 da kaba don 277,398 ngut ki samla pule, ong ka Institute of International Education.
Ha ka Sngi Balang, la iathuh ba ka tnat kam bar ri jong ka U.S., ka la pynsangeh noh ia ki jingthung thymmai na ka bynta ki nongaplai visa jong ki samla pule bad ki nongwan jngohkai pyrthei.
Namar la ong ba ka sorkar jong u Trump ha kane ka sien, ka la pynïar ïa ka jingpeit bniah ïa ki samla pule nabar ri ha ki Social Media bad ka dang ialeh bad thaw lad ban pynjur ia ki jingpyrkhing bad ban pynduna noh ïa ka jingsam visa sha ki samla pule ba nabar ri kum shi bynta jong ka jingpyrshang ba ratbah jongka ban pyndep ïa ka jingthmu ba tyngeh jong u Trump halor ka jingwan buhai shnong.
