Shillong, Jymmang 30
Ar ngut ki briew ki la duh noh la ka jingim katba 3 ngut kiwei pat ki la mynsaw namar ka jingtwa khyndew bad jingshlei um kaba la jia ha East Khasi Hills ha ka Sngi Thohdieng hadien ka jingther u slap ba khlem sangeh ha kine ki ar sngi ba la dep.
Kine ki kynthup ïa ka Kong Klosliya Kharkongor (50 snem ka rta) na ka shnong Lumkyntung kaba hap hapoh Laitkroh-Khatarshnong Block kaba la khlad namar ka jingtwa khyndew bad u Bah Samborlang Tariang (35 snem ka rta) na ka shnong Mawbynna Pomlakrai uba la khlad namar ka jingngam jyllop.
Haba ïadei bad kane, la dep ban phah ïa ki jingbthah sha ki DC ban pyllait ïa ka jingïarap pisa kaba mar T.4 lak sha ki bahaïing jong kiba la khlad noh.
Katkum ka kaiphod ba la ïoh lum na ki distrik bapher-bapher haduh ka 7 baje mynmiet jong ka 30 tarik u Jymmang, ki don 1023 ngut ki nongshong shnong bad 25 tylli ki shnong ba kynthup ïa 14 tylli ha East Khasi Hills, 2 tylli ha West Garo Hills, 1 ha East Jaiñtia Hills, 3 tylli ha Eastern West Khasi Hills bad 5 tylli ha Ri-Bhoi kiba shah ktah namar ka jingther u slap ha kine ki ar sngi ba la dep.
Ha kajuh ka por, ki don ruh 12 tylli ki ïing bad 25 tylli kiwei-kiwei ki jingtei kum ki surok, skul, dukan kiba la julor, nalor ka jingkhyllem dieng bad ka jingshah ktah jong ki laiñ bording.
