Shillong, Jymmang 30
Ka Meghalaya Tourism Development Forum (MTDF) ha ka Sngi Thohdieng ka la kyntu ïa ki lad pathai khubor jong ka ri (national media) ban don ïa ka jingkitkhlieh haba thoh shaphang ki khana jong ka Thaiñ Shatei Lam Mihngi.
Kane ka la jia shisngi hadien ba kawei na ki kotkhubor ba paw ka ri ka la jer kyrteng ïa ka Meghalaya kum ka “crime-prone” haba ka thoh shaphang ka jingjah rngai jong ar ngut ki nongjngohkai pyrthei na Madhya Pradesh ha ka thaiñ Sohra.
U President ka MTDF, Bah Larsing M. Sawian haba kren sha ki lad pathai khubor u la ong, “Ngi kwah ban phai khmat sha kawei ka jingthoh kaba la pynsngewsih bha, kaba la mih ha kawei na ki kot khubor jong ka ri hynnin ka sngi ha kaba ïa ki lum jong ngi la shah ñiew kum ki jaka kiba ju jia ki kam runar. Kane ka long kaba sngewkhia haduh katta-katta namarba ka pynpaw ba ka Jylla Meghalaya ne ki Lum Khasi ki dei ka jaka kiba ju jia ki kam runar bad kane ka long kaba ïalam bakla shi kat dei bad kaba hap ban pynrem jur.”
U la ong ruh ba la ju tip ba ïa ki nongshong shnong ka Jylla kum ka imlang-sahlang kaba ieid ïa ka jingsuk bad ki briew hangne, ki pdiang sngewbha ïa ki nongwan jngohkai pyrthei bad ym pat ju don kano-kano ka jingjia kaba ïadei bad ki kam runar ne kino-kino ki jingjia kiba sniew haba ïadei bad ki nongwan jngohkai kiba wan sha Meghalaya.
“Kane ka jingthoh ka pynpaw ïa ka Meghalaya ha ka rukom ka bym ïahap bad ngi shim ïa kane ka kabu ban kyrpad ïa kane ka lad pathai khubor kaba la pynmih ïa kane ka jingthoh ban sngewbha pynshai ïa kane namar kum kane ka jingthoh ka ktah haba phai sha ka jingkiew ki kam jngohkai pyrthei ne ki lad ban pynskhem ïa ka jingshaniah ban khot shuh ïa ki briew ban wan jngoh ïa ka Meghalaya,” u la ong.
Haba pynpaw ïa ka jingsngewkhia halor katei ka jingjia, u Bah Sawian u la ong, ka long kaba sngewsih ba haduh kine ki sngi ym pat lap ïa kitei ar ngut bad kyrmen skhem ba da ka jingwad yn sa lap ïa ki.
U la ong ruh ba ka Meghalaya ka dei ka Jylla kaba la kiew ha ka liang ki jaka jngohkai pyrthei khamtam ha kine ki 10 snem bad kumjuh ha kine ki san snem ba la dep. Ka thaiñ Sohra-Cherrapunjee, Dawki bad ka thaiñ baroh kawei jong ka phang Shathie ka Ri-lum Khasi ka dei ka thaiñ kaba kiew sted bha bad ki kam jngohkai pyrthei ha ki jaka nongkyndong mynta ki don hakhmat eh haba phai sha ka khana jingroi ha ki kam jngohkai pyrthei jong ka Meghalaya, u la ong.
Haba pynpaw ba ka Thaiñ Shatei Lam Mihngi ka la kiew bha ha ka liang ka ïoh ka kot kum ka thaiñ jong ka roi ka par, u Bah Sawian u la ong ba ka thaiñ ka don ha ka por kaba kongsan ha ka khana jingroi ka India ha kaba ka jingïatylli ha ka liang ka ïoh ka kot jong ka Thaiñ Shatei Lam Mihngi bad ka South East Asia bad kiwei pat ki bynta jong ka ri India ka long kaba kongsan na bynta ka jingroi bad jingïatylli jong ka ri.
Na ka liang une u nongïalam haba kyrpad ïa ki lad pathai khubor ka ri, u la ong, “Ka khana jingroi jong ka Thaiñ Shatei Lam Mihngi ka la sdang bad ka dang ïaid shakhmat bad ka nang kiew, bad dei ha kane ka kynti ba ngi kyrpad ïa ki lad pathai khubor jong ka ri ba kin long kiba kitkhlieh ha ka rukom ba phi ai ïa ki khubor kiba mih na ka Thaiñ Shatei Lam Mihngi.”
“Ngi long kiba kloi ban pdiang ïa ka jingkynthoh kaba ngi dei hok ban ïoh, ngi long kiba kloi ban rah ïa ki kti jong ngi lada don kaei-kaei kaba donkam ban pynbeit, hynrei, kaei-kaei ka bym shisha kaba la phah sha ki lad pathai khubor jong ka ri bad kaba la shon na bynta ki nongpule jong ka bynta kaba kham heh (jong ka ri baroh kawei) ki dei kiei-kiei kiba ngim sngew ïahap kum ka thaiñ. Kumta ngi shim kane ka lad ban kyrpad ïa ki lad pathai khubor jong ka ri ym pynheh ïa ki khubor ki bym shisha hynrei sngewbha sngewthuh ba ngi kwah ruh ïa ki khubor kiba shisha ban tuid na kane ka bynta jong ka ri,” u la ong.
