Shillong, Jymmang 30
Ki pulit ka East Khasi Hills ki la wan ban ïalam noh sha Shillong ïa u Himan Gogoi, 24 snem ka rta uba dei na Jorhat ha Assam uba dei u briew uba donkti ha ka ban khyllied skad ïa kawei ka khynnah skul ha Umsohsun kaba la jia ha ka step jong ka 23 tarik Jymmang, 2025.
Ki pulit ki la rah noh ïa u Himan Gogoi ha ka janmiet jong ka 30 tarik Jymmang, 2025, sha Ïingbishar ban pan jingbit na ka Ïingbishar ban tohkit bniah ïa u.
Kum ban shu pynkyn -maw hangne ba ka kynhun ki pulit hapoh ka jingïalam jong ka WPSI Lavinia Khongwang ka la hiar sha Jorhat ha ka 28 tarik Jymmang bad ha ka step kaba bud, ki la pynlong ïa ka jingkhynra ha ryngkat ki pulit ka Lahdoigarh Police Outpost ka Jorhat bad ki la ïoh kem ïa une u runar uba la riehtngen ha ka ïing jong ki bahaïing kaba don ha ka shnong Bamkukurachua, kaba hap hapoh ka thanat Teok, Jorhat.
Katkum ka kyrwoh na u Superintendent of Police (SP) ka East Khasi Hills District, Bah Vivek Syiem, u la ong ba ha shuwa jong kane ka jingjia ha Umsohsun, une u runar u la donkti ruh ban jrongkti bad leh kynshleiñ ïa kawei ka khynnah skul ha ka thaiñ Dreamland, Police Bazaar, kaba la jia ha ka 19 tarik Jymmang.
Ha kane ka jingïoh kem da ki bor pulit, la ïoh ban kurup noh ruh ïa ka mobile phone ba la pyndonkam da une u runar lem bad kiwei kiwei ki sakhi bad la shem ruh ba utei u briew u dei uba donkti ruh ha kawei ka kam bymman kaba la register case ha thanat Teok hapoh ka kyndon 329(3)/79 BNS Act.
Ïa une u runar la ïalam tiañ bishar shwa ha District Court Jorhat bad hadien ka jingïoh jingbit, la wan ïalam sha Meghalaya ban ïalam tiañ bishar pat ha ïingbishar ha Shillong.
