Shillong, Jymmang 30
U Myntri Rangbah ka Jylla, Conrad K. Sangma ha ka Sngi Thohdieng u la lum ïa ka jingïalang bad baroh ki Deputy Commissioner (DC) ban khmih bniah halor ka jinglong-jingman suiñ bneng namar ka jingbeh ka lyer ba jur bad jingther u slap kaba dang bteng mynta hapoh ka Jylla.
Ha kane ka jingïalang, u Sangma u la bthah ïa baroh ki DC ban long kiba husiar bad kiba peitngor ha ki 24 kynta ban wan khamtam haba ïadei bad ki jingtwa khyndew bad jingshlei um ha ki jaka harud um.
U la bthah ban weng ïa ka jingthut ha ka leit ka wan ki kali bad ban pyntikna ïa ka jingïarap sha ki nongleit nongwan.
U Myntri Rangbah u la kyntu ruh ban phiah ïa ki District sha ki Zone na bynta ka jingpynïaid kam kaba paka haba ïadei bad ki jinglynshop mariang bad ban pyntikna ïa ka jingïarap ba mardor sha ki longïing kiba shah ktah.
Ha kajuh ka por, la bthah ïa ki ‘Field Officer’ ban don ha la ki jong ki jong ki ‘Headquarter’ bad la bthah ruh ïa ka MeECL ban pynbha ïa ka bording ha ki jaka ba shah ktah bad ban phah briew shuh na bynta kane kajuh ka kam.
Na ka liang u Sanjay Goyal, IAS, Commissioner & Secretary ka tnad Revenue & Disaster Management ha ka kyrwoh u la pyntip sha u Myntri Rangbah ka Jylla halor ka jinglong-jingman ba mynta ha ka Jylla ha kaba ïadei bad ki lad pynkhreh bad ki sienjam ba la shim da kawei-pa-kawei ka distrik.
Ha kane ka jingïalang khmih bniah, ki distrik ki la pyntip halor ki jingjia jong ki jingtwa khyndew, jingshlei um, jinghap jong ki dieng, jingjulor jong ki jingtei bad ka jingthut ha ki laiñ bording.
Ka ophis jong ka IMD (Regional) ka la pyntip ba ka jinglong-jingman kaba mynta ka lah ban bteng haduh ka 31tarik Jymmang, 2025.
Kumjuh, ka State Disaster Management Authority (SDMA) bad ki District Disaster Management Authority (DDMA) ki dang buddien ïa ka jinglong-jingman ryngkat ka jingpynkhreh ïa ki lad jingshakri ba kyrkieh.
Shuh shuh u Myntri Rangbah u la bthah ïa baroh ki bor ba dei khmih bad ki tnad treikam ban long kiba husiar bad ban leh ïa kaba donkam ban pynduna ïa ka jingktah jong ka jinglong-jingman.
La kyntu ruh ïa ki paidbah ba kin long kiba buh jingmut ïa ki jingtip, kiba la pynkhreh bad ban shim ki lad jingïada ban pyntikna ïa ka jingshngaiñ ha kum kine ki jingjia.
